“Cualkier chens cu mi haya pa papia di mi yiu muhe grandi ta un oportunidad. Y e chens cu mi a haya awe ta un oportunidad pa splica e situacion,” e titular di Husticia y Asuntonan Social a bisa den Parlamento.
Varios Parlamentario di oposicion a haci e pregunta riba e tema di e relación di Minister Tjon cu su yiu, of e falta di contacto, cu nunca antes a bini dilanti. Awe den Parlamento e mandatario a bisa cu el a haya un bon chens di papia riba e situacion y a entrega tur documento. El a bisa cu e situacion t’asina cu na momento cu su yiu cumpli 18 aña e mes por dicidi pa tuma contacto c une.
EL a splica cu su yiu muhe mas grandi a nace na februari 2007 y for di e fecha ey te cu 2010 e mester a bringa den Corte e derecho pa tin contacto cu su yiu. “Tur cos mi a gana. Dia 6 di februari, 2010, tabata ultimo biaha cu mi a wak mi yiu. E ora ey e falsedad cu a wordo lansa contra mi persona a wordo entrega.” Riba e fecha ey e por a haya un areglo pa mira su yiu, pero a base di e mentira ey e mama a evita e areglo aki.
E mandatario a lesa e rapport policial traha door di Robert Candelaria, ora cu e tabata forma parti di Cuerpo Policial. Eyden e mama ta bisa cu e no ta interesa pa entrega keho y su único deseo ta pa e tata no tin contacto nunca mas cu e menor di edad. El a pone e documentonan aki ter inzage pa e miembronan di Parlamento y tambe documentonan cu a bay den pasado na ex ministernan unda cu a splica kico e investigación tabata y con esaki a tuma luga. E tempo ey a bay profundamente den e tema aki pa motibo cu su persona tabata forma parti di KPA y e mama tabata traha na Ministerio Publico.
E mandatario a bisa tambe cu a seponeer e caso pa motibo cu no tabatin ningún base ni prueba pa hiba un caso dilanti. E vonnis cu contrincantenan ta papia di dje, ta publico caba y el a pone esaki un biaha mas na disposicion di Parlamentarionan.
Motibo cu no tin contacto tambe a wordo splica door di Hues tambe y esey por les’e den e documentonan. A mustra con a mande bay studia mas avansa den e ramo policial y despues a hasta postul’e como candidato pa bira director di KIA. E tin carta hasta di ex prome minister Mike Eman cu ta elogi’e. El a pasa den dos diferente screening. Tur esakinan el a pone na disposicion henter Parlamento. Inclusive decisionnan di Corte unda cu a condena diferente persona pa difamacion contra Rocco Tjon relaciona cu e caso di su yiu.
“Sr. Dowers ta na altura di tur detaye, mi no ta spera p’e defendemi, pero si mi ta spera pa e percura pa bienestar di mi yiu. Sr. Candela ta na altura di tur detaye, mi no ta spera e defende’mi. Pero mi ta spera si di dje pa e splica su coleganan e detayenan aki pasobra ta perhudica un mucha.”
Pero mas cu tur cos, el a bisa, e ta lamenta e actitud di ex trahado social drs. Mervin Wyatt Ras. E ta toca su famia di leu. Ora cu e cos a sosode na inicio, Wyatt Ras a bay cerca omo di Tjon, kendenan a splik’e tur loke cu a pasa. “Ta duel mi cu net Mervin Wyatt Ras, kende como famia sa tur detayes, e tempo ey e no a sali na bienestar di mucha. Awe pa motibonan politico, e ta escoge pa bay e rumbo aki,” Tjon a bisa.
E unico motibo pa no tin contacto ta e tension cu tin entre Tjon y su ex casa. E asunto di tema sexual no tin nada di haber cu no a duna e mandatario e areglo di contacto. Un otro sentencia ta bisa cu e comunicacion entre e mayornan ta asina tenso, cu no ta bon pa permiti un contacto entre tata y yiu, y e lo empeora e situacion pa e mucha. Ta na interes di e mucha y mayornan, Corte no ta bay obliga e menor pa mira su yiu. El a lamenta tambe cu tatanan no tin mucho derecho y esaki ta algo cu el a pasa aden.
E tabatin como tata e opcion pa despues di un aña bay Corte, pa pidi un areglo, pero e no a haci esaki pa lastra nomber di su yiu atrobe. Como tata el a prefera warda pa e yiu mes busk’e ora cu e ta mayoria di edad.
Minister Rocco Tjon den Parlamento a gradici algun Parlamentario e oportunidad cu el a haya pa splica kico a pasa cu su yiu muhe, y e hecho cu e no por tin’e cerca di dje.
