Bon dia yen di sabiduria den nos alegria ! Djies aki un luna nobo lo hasi su entrada. Y varios hende ya lo cuminsa dorna nan cas pa Pascu y pa e fiestanan di fin di anja. Radio emisoranan lo cuminsa toca canticanan di Pascu y fin di anja. Lo tin hopi kerstboom na venta e anja aki ? Si ta asina, e prijsnan lo ta caro atrobe ?Nos ta corda , con un anja, varios anja pasa, nos a decidí di no cumpra kerstboom pa Pascu. Pero despues cu mas dia tabata pasando, nos toch a sinti na nos curason pa cumpra un, pero ya no tabatatin mas kerstoom ningun caminda. Nos tabata hopi disapunta y hopi tristo, pasobra , mas serca e dia di Pascu tabata yegando, y ya nos a core tur caminda unda nan sa bende kerstboom. Pa mi suerte mi a haya un yamada telefonico di un amigo cu a tende cu mi ta buscando kerstboom pa loco tur caminda. Ela bisami cu den cura di Club Caiquetio na Paradera tin un kerstboom benta banda di e hekki, un mahos sin hopi taki y no berde berde mas tampoco. Parse cu nan a bentele afor, pasobra e tawata mucho mahos. Nos a core bay wak y di berdad tabatatin un kerstboom flaco tur di duars, no mucho taki, schuins un crenchi of hopi seco caba, pues birando un crenchi bruin caba. Nos corazon a hasi un bula di alegria y nos a bay cu e kerstboom ey . Como un Poeta hopi cos a pasa den mi cabes, mi mente tabata baila un wals di nostalgia pa tur e matanan di kerstboom cu tabata wordo hekap pa hiba rond mundo pa famianan por celebra Pascu cu un mata cu no ta crese tur caminda, tampoco akinan, cu nos ta dorna cu bala y luz. Mi a pensa con tristo e palo di kerstboom aki tawata, esun cu mi a busca cu tabata benta banda di e hekki di Club Caiquetio , su so benta eybao den su soledad. Pero con contento ela bira, ora mi a hibele mi cas, dornele cu balanan color di Pascu, berde, cora y oro. Despues dornele cu e luznan chikito blanco. Ta manera e kerstboom tabata papia cu mi, mi a sintimi asina bendiciona cu mi por a topa cu nele. Ta manera e muchanan special di awendia cu ta mustra un crenchi diferente , ora nan hanja extra atencion cu amor, con nan cara ta briya ! E Pascu ey mi a yora di alegria y hopi gradicimento na mi curason, pa a sinja un otro les, cu , e mahosnan tambe ta hopi pero hopi bunita ora nan ta wak bo cu nan wowonan inocente. Hopi biaha ta e cosnan simpel y chikito ta e cosnan cu ta trese mas bendicion, mas satisfaccion den bida. Dijes ta luna di Oktober, un luna special pa nos famia cu cumpleanos di mi querido Tata Lucas Bergen cu lo cumpli 89 e anja aki.
Djies ta fiesta di Halloween. Y djies ta Pascu, pasobra e luna di December ta eymes na skina, cla pa drenta atrobe. Sea abo tambe un bendicion pa otro cu ta den necesidad. Nos ta pasando den temponan complica y dificil, cos no ta manera algun anja pasa. Nos tin cu cuida nos mes y cuida otro. Pone famia prome. Pone prioridadnan pa cumpli cu nan. Ban sigui accepta e dia como un regalo precioso di balor impagabel. Ban sinja di nos foutnan y hasi nos best pa ta un mihor hende tur dia. Nos cada un tin un mission den bida, nos a bin pa stima y wordo stima. Sea un ruman,sea un amigo. Corda cu bo ta cosecha locual bo ta sembra. Danki pa lesa nos relato di e siman aki, te un otro oportunidad. Love you too !
