Nos mester hala atencion di hopi famia, pa nan ta na altura, cu palabra malo ta demotiva henter bo cas, descurashando bo yiunan.
Ningun hende ta wordo curasha, of motiva ora constantemente e ta tende solamente palabra negativo den su direccion.
Si un mucha no ta comporta su mes bon e no ta drecha cu palabra negativo, pero cu palabra positivo,y amor di Dios bo ta trece bek riba e caminda drechi.
Awor esaki ta sabiduria di for cielo pa bo como Mayor; Tur bondad cu abo kier mira sosode den bida, di bo yiu, bo tin di proclama esey tur momento, pasobra dilanti di Dios bo palabra tin peso, y cada palabra cu sali for di bo boca tin efecto riba bida di bo yiu.
Pesey den e buki di Efesionan capitulo 6 vers 4 ta bisa lo siguiente boso tatanan ( mayornan) no provoca boso yuinan na rabia , ma lanta nan den e disiplina y instruccion di Señor.
Den Mateo capitulo 3 vers 17 Dios Tata un duna un les na nos tur bisando asina aki: Y ata un bos for di cielonan bisando :Esaki ta Mi Yiu stima den Kende mi tin goso.
Y nos tur por a mira con e bida di Hesus a bay dilanti, semper den comunicacion cu su Tata, y den obedencia.
Y pa motibo di Su obedencia ,den e buki di Philipensenan capitulo 2 vers 9 ta para scirbi: Pesey Dios a hals’E te na e alturanan, y duna Hesus e nomber cu ta riba tur nomber, cu pa e nomber di Hesus tur rudia mester dobla, di esnan cu ta den cielo, riba tera y bao di tera, y cu tur lenga mester confesa cu Hesus Cristo ta Señor pa e Gloria di Dios Tata.
Awor con por ta posibel, cu tin mayor ta expresa nan mes bisando; Cu nan yiu no ta sirbi pa nada?
Prome cu bo haci un exprecion asina como mayor, bo tin cu wak bo mes bon, wak rond di bo, y wak kico abo por a haci cu a pone cu bo yiu ta haci cosnan robes.
Pasobra ningun mata no por desbalora su propio fruta, ni tampoco su simia.
Bo palabranan di bendicion ta habri porta pa bo yuinan, ora Jacob a horta bendicion di Esau , Esau a puntra su Isaac su tata si Isaac a warda un bendicion pe , pasobra Esau conoce e balor di bendicion di su tata.(Genesis capitulo 27 vers 36 y 38 )
Ora e yiu prodigo a pidi herencia y bandona cas, e tata nunca a expresa nada malo den su direccion, pero ora cos no a bay bon cune, e tata a tume bek na cas. ( Lucas capitulo 15 vers 19).
Expresando palabra nan ofensivo, negativo, sushi, cu ta demotiva bo yiunan, abo como mayor ta cultiva un crisis familiar, cu segun tempo lo bira parti di crisis social.
Como Mayor ban uni hunto den oracion y trece cambio den e situacion aki mas liher cu ta posibel.
