E traspaso di cartera ta sigui y diahuebs Minister Ursell Arends a ricibi e carteranan di – Naturalesa y Medio Mmbiente, Serlimar, Ouderen Raad y Bienestar di Animal. Comunidad por spera cu durante di e proximo Gabinete naturalesa lo haya e atencion debido, ta expresionnan cu Premier Evelyn Wever – Croes y futuro Minister encarga cu e cartera a accentua.
Den trascurso di e periodo di formacion di Gobierno, a reuni cu varios di e organisacionnan y departamentonan relaciona cu naturalesa y medio ambiente pa duna e sector aki e atencion debido pa asina e por ta un “well oiled machine”.
Segun sr. Arends, a tuma nota cu comunidad tambe ta poniendo mas atencion y dunando mas importancia na e tema di naturalesa. Pues, ta na su debido momento pa Gobierno duna esaki e atencion debido y necesario pa asina trece trankilidad tambe den nos comunidad. Dierenwelzijn tambe ta un tema importante cu lo forma parti di naturalesa, pues lo duna esaki e atencion debido.
Pa loke ta e cartera di Ouderen Raad, sr. Arends a splica cu asuntonan di adultonan mayor tambe lo wordo atendi cu ne debidamente den e proximo Gabinete. ‘Manera cu cifranan di vergrijzing ta indica, tin mas di 25 mil ciudadano riba e edad di 60 aña. Y durante di Pandemia ta netamente nos adultonan mayor hopi biaha ta esunnan cu ta wordo isola cual ta cosnan cu nos a wak y nos kier duna atencion debido.’
E grupo di personanan mayor a gana hopi experiencia den bida y unabes cu nan yega na edad di pensioen, den nos pensamento, nan tin hopi mas pa sigui contribui na e bienestar di Aruba, sr. Arends a enfatisa.
Den cuadro di Serlimar e futuro mandatario encarga a splica cu lo trece plannan di con ta bay maneha desperdicio, teniendo na cuenta un maneho cu lo beneficia naturalesa den su totalidad.
Esaki ta e plan coherente cu e proximo Gabinete lo atende cu ne y dentro di poco lo cuminsa propone y presenta e proximo solucionnan den e maneho di e carteranan cu ta resorta bou di mi ministerio”, sr. Arends a termina bisando.