Hof a cera tratamento di e caso di apelacion di IBiS

.Un caso cu su investigación a cuminsa casi cinco aña pasa. A papia di 100 hende envolví pero den prome instancia a presenta 23 acusado y awo den apelación tabatin solamente seis caso: Paul Croes; Melony Croes Paesch; Jairo Wever; Robbio di Vechia; Ninosca Nunez; y Rudmilla Yvonne Martinus.
Cu excepción di Melony Croes Paesch tur e otro caso a finalisa nan tratamento caba. Di Paesch tabata awe pa motibo cu a entrega un rapport financiero di nan cuentanan pa demostra cu no por papia di labamento di placa, manera Ministerio Publico ta acus’e di dje, según su abogado mr. Illes a trece dilanti.
PG sin embargo no a bisa di no ta mira nada special den e rapport. E no por saca otro conclusión cu tabatin labamento di placa y e ta papia di un suma di mas cu 209 mil florin. Y esaki a tuma luga den negoshi di Melony Paesch. PG a papia di circulación di placa poco dudoso, pa motibo cu no tin splicacion pa nan.
Según PG, e tabata gasta mas di loke e tabatin na entradanan y e suma grandi cu no por wordo splica, no ta kere cu esaki por ta ganashi di su negoshi.
PG a pidi pa ratifica e sentencia di prome instancia cu tabata 240 ora di trabou pa comunidad.
Pero Paesch, den su ultimo palabra, a bisa Hof cu e 240 ora di trabou no ta problema, “pasobra nos ta un famia cu ta conoci den comunidad cu ta yuda hopi. E problema ta pa mi drecha mi nomber. AMi ta esun cu a apela e sentencia, pasobra mi no kier keda cu e cos aki riba mi nomber pasobra ami no a laba placa.”
El a bisa Hof cu e mester limpia su nomber si no e no por biba na Aruba. Desde di e caso aki, porta di tur banco a cera p’e. “Mi no kier depende di mi mama ni mi tantanan, aunke cu nan kier yudam’i.” Y el a conta con el a hinca su mes den tur sorto di cos pa e por logra haya un entrada pa motibo cu e no kier depende di ningún hende, ni di su casa, pa tin placa den su cartera.
Pero tambe el a papia di e infierno cu e investigación aki a hinca su yiunan aden desde cu casi 40 homber arma a drenta su cas cu arma. E muchanan a keda cu efectonan psychologico, problema di stoma pero tambe di comportacion. Basta largo el a papia, algun biaha cu lagrima na wowo pa expresa pakico el a dicidi di apela e caso.
Dia 12 di october awo tin sentencia pa 1.30 di merdia.