Den su intencion pa ridiculisa e lider di RAIZ y Minister Ursell Arends, e lider di oposicion pa fraccion di MAS, Marisol Lopez Tromp, ta confirma cu loke e ta exigi di otronan, e mes no ta cumpli den loke e mes ta predica.
Den un reaccion riba un declaracion haci pa Ursell Arends, e veterano lider di oposicion MAS a haya ta bon pa mustra cu e lider di RAIZ no sa ainda di politica ya cu no ta e minister ta invita un parlamentario pa bin duna cuenta pero ta net al reves.
Aki ta bon pa mustra cu na ningun momento Minister Arends lo a trata di cuestiona e rol di un parlamentario den su funcionamento pero si esaki no tin e iniciativa pa haci pregunta na un mandatario, e mandatario por mustra su disponibilidad pa duna informacion cu ta necesario.
Ta mas cu claro cu e lider di RAIZ kier confronta Parlamentario Lopez Tromp riba acusacionnan serio cu el a haci den direccion di rivalnan politico casi un aña pasa pero te cu dia di awe ainda no a presenta na pueblo, ningun clase di prueba pa confirma su ponencianan. Hasta tabatin personanan cu e politico veterano di MAS a kita di trabao y nan a bay corte y gana nan caso y nan ta bek na trabao.
Marisol kier mustra Ursell di e spiritonan den gobierno pero e tambe ta haci acusacionnan spirito colgando rond, sconde tras di lomba di ministerio publico cu e excusa cu e no kier stroba e investigacion.
Loke e veterano politico aki ta lubida ta cu como representante di pueblo, e tin cu duna cuenta na pueblo y si el a logra un total di 4191 voto den ultimo eleccion, e tin cu duna cuenta na tur e hendenan aki di loke el a descubri y loke el a yama actonan contra ley.
Ursell Arends Minister den gabinete Wever Croes II simplemente a urgi na ex Minister Lopez Tromp y actualmente miembro di parlamento, pa bin dilanti y presenta prueba concreto y legal na pueblo, e mesun hendenan cu e ta representa y no sigui insisti cu e no por mustra nada na pueblo.
Si ta papia di transparencia anto Marisol a faya cu esaki masha tempo caba., for di tempo cu den parlamento el a lansa e acusacionnan aki cu casi un aña despues, ainda ta colgando den aire, sin mucho claridad y sin mucho splicacion.
Minister Arends a haci un gesto den direccion di e parlamentario sin cu ningun momento el a trata di insulta of menosprecia e funcionamento y deber di e parlamentario di partido MAS pero na momento cu trata di conta e cantidad di voto di 4191 di dj e compara cu 1939 di e lider di Raiz, e ta mustra riba un argumento fofo.
Ta bon pa mustra e lider di MAS cu den eleccion di 2017 como candidato riba lista di POR, Marisol drenta Parlamento cu a 495 voto y despues a bira Minister cu e mesun cantidad di voto aki pero pa e logra 4191 total di voto den eleccion di juni ultimo, Marisol a usa argumentonan politico di corupcion cu lo a tuma luga sin cu el a mustra na cualkier ocasion, di kico e ta papia of kico e pruebanan aki ta, sea cu nan ta legal of no tin base.
Ta bon pa Marisol corda cu den su periodo como minister di infrastructura pa partido MEP, tambe tabatin di e tipo di spiritonan aki canando rond, tambe tabatin cosnan den su maneho cu nunca el a duna un splicacion na pueblo pero awor kier pretende pa splica un Minister con e tin cu haci su trabou.
EDITORIAL