Pa presenta e iniciativa pa adapta e Landbesluit Bijstandsverlening cu ajudo
financiero na famianan cu un jiu bao di 16 anja cu limitacion, a bishita e
organisacion Sonrisa y a reuni cu miembronan di e organisacion aki. Sonrisa ta un
iniciativa di mayornan pa duna acohida y guia na muchanan menor di edad cu tin
retonan fysico y intelectual. Lider di Fraccion di AVP, Mr. Mike Eman, y
parlamentario drs. Mervin wyatt-Ras y sr. Wendrick Cecilia a combersa cu e
coordinado sra. Anglique Perez-Kelly y dos lider, di cual un di nan ta mama di un
cliente.
A duna splicasion encuanto di e proposicion di cambio di e Landsbesluit pa
ehecucion di articulonan 8 y 19 di e ley cu ta reglamenta e Landsverordening
Maatschappelijke Zorg. Esaki di tal forma cu despues di articulo 8 cu ta
reglamenta e Gehandicaptenuitkering pa un mucha/persona riba 16 anja, ta
agrega un articulo nobo 8a. Articulo 8a. ta reglamenta e derecho di bijstand di un
mayor cu yiu cu limitacion di edad mas hoben cu 16 anja. E provision aki ta conta
pa muchanan di edad mas hoben cu 16 anja cu tin un limitacion fysico y/of
mental. E cuido y educacion di un mucha cu limitacion fysico y/of mental ta trece
cun’e costonan adicional pa e famia. Por pensa riba sosten pa cas, manera por
ehempel pago di ayudo domestico, pasadia, adaptacionnan na vivienda, cuminda
special, transporte of guia extra. E gastonan ta mas halto cu e cuido normal y di
educacion pa un mucha. Falta akiden por trece e calidad di bida di e famia y di e
mucha den desventaha enorme.
E Kinder- Gehandicaptenuitkering ta maximo 950 florin, igual cu e suma menciona
den articulo 8. Conforme Censo 2010 cu tin 318 hoben cu limitacion por sali afo
cu awendia nos por tin 400 hoben cu limitacion bao di 16 anja. E suma aki por
yuda e hoben y su famia pa cumpli cu tur necesidad pa garantisa manera
Derechonan Humano ta indica tambe un calidad di bida digno.
Durante e reunion cu representantenan di Sonrisa a intercambia den extenso
encuanto experiencia di mayornan pa loke ta trata e reto di haya tende cu e
mayor tin un yiu cu un deficiencia y cu e deficiencia aki ta permanente. E hecho cu
un mayor di hopi tempran por nota cierto senjalnan cu tin un of otro desaroyo cu
ta diferente no necesariamente nifica cu e diagnostico ta tempran. Mayoria di
mucha ta ser diagnostica ora nan tin 5 of 6 anja di edad. Aki e mayor ta
experiencia cu no tin mucho sosten for di tempran pa loke e ta pasando aden.
Eman, Wyatt-Ras y Cicilia a keda impresiona cu e trabou di Sonrisa.
E representantenan di Sonrisa ta haya e idea di un gehandicaptenuitkering pa
hobennan di edad bou di 16 anja un bon iniciativa. Ta haya necesario si pa por tin
control riba gastamento di e suma, locual lo mester ta den man di e instancia cu
ta otorga e suma menciona.