Patriotismo den enseñansa di Fundeshi

Akademia Popular Errol Scoop”/APES, e ala di formashon emansipatorio di “Movementu Kousa Promé”, djaluna 6 di sèptèmber último tabatin su di dos lès den e siklo di formashon emansipatorio titulá: “Patriotismo, un wes’i lomba pa e yu di Kòrsou Nobo”. 

E lès aki tabata na enkargo di señora Indira Boelbaai, èks dosente i èks kabes di skol ku mas di 40 aña di eksperensia den enseñansa. Na un manera kla, bibu i dinámiko señora Boelbaai a elaborá e tema “Patriotismo den enseñansa di fundeshi” i a pone atenshon riba diferente aspekto importante di patriotismo relashoná ku enseñansa. Saliendo for di enseñansa di fundeshi señora Boelbaai a enfoká riba síntomanan ku ta indiká  falta di patriotismo serka hóbennan, manera falta di rèspèt i interés, aktitut destruktivo i delinkuente. Di otro banda tin hopi hóben ta move positivamente den deporte, grupo sosial, kultural i religioso i scouting.

Partisipantenan a haña splikashon di e motibu real di falta di patriotismo ku ta ankrá den nos historia violento i represivo ku a krea mayoría yu di Kòrsou sin orguyo, sin balor propio i sin amor pa patria. Nos por papia di un krísis di identidat. Enseñansa ku nos konosé aki na Korsou tampoko no a kontribuí na sanashon di e krísis aki. 

Señora Boelbaai a sigui splika ku solushon pa e falta grave di patriotismo ta e dekolonisashon di e mente, pa medio di formashon. E plataforma adekuá pa traha na patriotismo ta enseñansa, pasobra via enseñansa ta alkansá un grupo grandi di mucha te e hóben adulto. Asina por traha na un manera organisá, planifiká i sistemátiko na formashon, konsientisashon i fortifikashon di e mucha i e hóben. Naturalmente mester forma i konsientisa e maestronan tambe. Patriotismo mester ta un parti importante di e estudio pa bira maestro. 

Importante ta pa kuminsá for di enseñansa pre-eskolar Patriotismo mester ta integrá den tur materia. Aspektonan di formashon importantísimo ta entre otro historia i kultura propio, nos idioma papiamentu, nos patrimonionan kultural, natural i historiko, himno, i bandera. E konosementu aki ta kultivá amor pa patria i fortifiká e wesu di lomba di e yu di Kòrsou for di su fundeshi.

Akademia Popular por mira bèk riba otro lès eksitoso den su trayekto di formashon emansipatorio.