KvK, ATIA y CUA, como representantenan di e comunidad empresarial, ta hopi preocupa ya cu e aumento drastico di prijs pa container ta pone un peso grandi riba hopi compania y ademas sigur lo resulta den un nivel halto di inflacion cu lo afecta nos tur.
Debi na diferente contratiempo den e mercado international di carga maritimo y continental, e prijs pa transporta containers ta keda aumenta. Pre-Covid, e prijsnan pa por ehempel containers for di China tabata fluctua entre 3.000 y 4.000 dollar. Actualmente esaki ta riba 20.000 dollar pa container caba. E aumento di prijs di containers for di Brazil, Europa y Merca tambe ta significante. Aparte di esey, mester paga impuesto pa importacion di producto, pues e prijsnan excesivo pa containers tambe ta resulta den aumento di e suma di impuesto pa importacion, ya cu e ta wordo calcula a base di e balor di gastonan di producto, seguro y carga “Cost, Insurance, Freight” (CIF). Esaki ta contrario na otro paisnan, incluyendo den Caribe, caminda ta aplica e impuesto solamente riba e producto mes “Free on Board” (FOB).
Den e siguiente tabel por mira un ehempel den cual e prijs pa importacion di auto-parts ta aumenta cu 46% a consecuencia di e gastonan adicional di transporte y impuesto di importacion (261,826 en bes di 179,000 florin). Den caso cu e suma di impuesto pa importacion bay wordo calcula riba e producto mes (FOB), e gastonan adicional lo ta 7,835 florin menos.
E desaroyo di aumento di prijs pa importa productonan ta hopi preocupante ya cu hopi compania no ta conta cu suficiente “cashflow” pa por keda importa producto na prijsnan halto y cu ta sigui aumenta continuamente. Alabes, e situacion aki no ta rendabel ya cu e comerciante lo mester opta pa adapta e prijsnan di producto, locual lo resulta den perdida di benta y entrada teniendo cuenta cu e consumidor tampoco no tin espacio pa cumpra productonan caro di cual e prijs ta sigui aumenta. Pa definicion, e desaroyo aki pues lo aumenta e nivel di inflacion.
KvK, ATIA y CUA ta boga pa adapta e base pa calculacion di e impuesto di importacion y aplica e balor di FOB en bes di esun di CIF. Si aplica e impuesto solamente riba e producto mes, lo evita cu lo wordo cobra mas cu un biaha pa e aumento di e prijsnan di container. E solucion aki ta simpel, facil di maneha door di Douane y lo reduci e presion di inflacion debi na costonan excesivo di carga.
Anticipando riba e trayectoria pa cambio di e ley y pa duna un alivio rapido y mitiga e efectonan, ta haci un apelacion na Gobierno pa entretanto aplica e cambio aki por medio di “begunstigend beleid”.
