E siman aki a tuma luga e di 31 edicion di e Conferencia Annual di Turismo (CATA) via online.
Durante e conferencia anual virtual di CATA, a wordo introduci diferente orador, cada uno cu su propio presentacion.
Despues di e apertura, Sanju Luidens-Daryanani – CMO di Aruba Tourism Authority a comparti cu A.T.A. ta trahando incansabel riba e e plannan di mercadeo pa 2022. Asina ta pone hopi enfasis pa mehora e experiencia digital di esnan cu ta bishita nos website pa inspira y enamora cu nos isla, capturando mas bishitante pa nos destinacion.
E socionan di A.T.A. ta fundamental pa negocia den e industria di turismo y debi y danki na esaki, e posicionamento di Aruba ta fuerte den e mercado di Latinoamerica. Den e ultimo añanan e socionan tawata hopi involucra den e diferente strategia digital cu a wordo planta den e mercado aki pa medio di diferente campaña y promocionnan.
CATA 2021, ta e Conferencia Anual di Turismo pa Aruba pa e mercado latinoamericano y un di e conferencianan turistico mas importante den e region di Caribe. E mensage principal pa e aña aki tawata “Una mirada al turismo del futuro”. E aña aki tawatin un total di 1038 participante, entre otro di paisnan manera Argentina – Brasil – Chile – Colombia – Ecuador – Paraguay – Peru – Uruguay – Venezuela y Aruba. E prome dia a ricibi mas cu 700 bishita durante e conferencia principal. E di dos dia tawatin e vitrina entre e socionan unda por a nota un total di 433 citanan programa.
E invitadonan a comparti nan experiencianan cu temanan hopi varia entre otro di turismo sostenibel, bienestar, innovacion y con pa supera e crisis actual.
E prome orador tawata Nicolás Marin, un activista y fotografo di NatGeo cu su charla “Turismo sostenible: Desde la tierra hasta el fondo del océano”, unda el a pone enfasis riba e ecoturismo y nan forma pa respeta e comunidad local y nan cultura y promove negocio local pa medio di ‘good practices’ (practicanan honesto).
Sigui pa Claudia Téllez, directora comercial pa e region di Latinaomerica di e website Kayak, a papia di “Cómo sobrevivir a una pandemia”. Esaki tawata relaciona cu e inovacion cu a desaroya durante e pandemia pero tambe durante temponan di reto y cu for di esey e importancia di e creatividad por resalta pero tambe e manera pa adapta durante temponan dificil.
Santiago Rojas, un doctor y experto den salud como tambe e ta locutor di e programa radial “Sanamente” na e emisora di Colombia Radio Caracol, a enfoca riba e importancia di nos bishitantenan y nan bienestar. El a splica con Aruba cu su clima casi perfecto y su solo briyante hunto cu e alegria di nos hendenan local por comberti e vacacion pa uno di terapia unda e bishitantenan por obtene un miho estado di salud mental como tambe fisicamente.
Despues Alvaro Sepúlveda, CEO di Media Trends, a presenta su tema di mercadeo online y con livestreaming lo bira e futuro di e-commerce. Awendia e consumidornan mas y mas ta confia nan propio comunidad na unda nan lo pasa mas tempo online pa consumi contenido nobo riba e mercado.
Na final Alan Estrada conoci pa su video blog ”Alan por el mundo”, a duna su vision riba e futuro di e creacion di contenido pa e industria di turismo y pa asina atrae cada bes mas bishitante poniendo enfoke cu e trabao aki no mester enfoca solamente riba e cantidad di haya mas hopi likes pero alcontrario pa yega na un post cu lo inicia un combersacion amplio.
