Diahuebs den oranan di dia pa anochi a sosode un hecho macabro, un abuso completo di animal sin cu niun instancia por haci algo. Cuatro pushi a wordo mata, venena, y e persona cu a comete e delito aki ta keda impguna. Tin ley pa protege bestianan contra negligencia of nan bida, pero manera cu e ta awo no ta brinda ningun proteccion.
Un famia na Cura Cabay nunca a kere cu e menasa di un bisiña contra poco pushi lo a bira realidad. Diahuebs mainta na momento cu nan a haya e prome pushi morto, no a sospecha nada straño. Sinembargo na momento cu den oranan di merdia pa atardi a cuminsa haya falta di mas pushi y e holo desagradabel a sigui, a pesar di a dera prome, a lanta e sospecho. Asina nan a bin descubri cu cuatro di nan 9 pushinan a muri riba un solo dia. Algo straño. Na momento cu a bira nan cara y mira cas di bisiña a topa cu e evidencia: algun bolita blauw pa mata djaca y un bleki sardin poni den solo manera invitando e pushinan pa bin come. Bestianan cu e señora doño di e cas mes tabata custumbra di duna nan cuminda.
A bati alarma na Polis, cu a conseha nan cu si kier sigui cu e caso, mester hiba e curpanan Abbatoir pa haci autopsia cu por wordo agrega na e denuncia y pa e caso por sigui cana. E famia kendenan ta stima bestia a bisa cu lo no laga e asunto caba na nada. No solamente pa amor na bestianan pasobra nan a keda cu cinco pushi y 9 cacho cu cualkier momento por bira victima.
Pero atrobe tin ley pero e no ta protege e bestianan. A resulta cu den ley di maltrato ta para cu mester entrega un toxicology report. Na abattoir a bisa famia cu nan por traha e rapport ey, e pushinan mester ta bibo pa haci esaki. E famia a keda cu cuatro pushi morto den un saco y cu nan no a keda nan nada otro cu hiba nan dump. Ki tristesta: Aruba 2021.
Tur e cacho y pushi cu e famia aki tin ta cu nan mes a recoge banda di caminda, door cu hende a bandona nan. Un di e pushinan mata, tabata uno cu a subi den auto di e yiu homber luna pasa na un restaurant, kende a haya duele di dje y a bay cu ne cas. Tur luna ta saconan grandi e famia ta cumpra di cuminda, a pesar cu ta e tata so ta traha. Esaki ta amor pa bestia y no un bestia den curpa di hende. Paz na Pauchi, Felix, Bato y Boost!
