Fundacion Telefon pa Hubentud Aruba a ser funda na 1999 y desde e tempo ey Telefon pa Hubentud ta duna ayudo tur dia via di e telefon 131, 131App y 131.aw na e muchanan y hobenan di Aruba. Gratis y anonimo e muchanan y hobenan di Aruba ta tuma contacto cu Telefon pa Hubentud pa papia tocante nan sintimentonan. Banda di e ayudo via telefon 131, 131App y 131.aw, Telefon pa Hubentud ta duna charla, workshop y proyecto den scolnan, clubnan deportivo y otro lugarnan cu mucha y hoben sa bishita.
Telefon pa Hubentud tin como meta pa duna nos muchanan y hobenan informacion pa asina cu e informacion aki nan por tuma mihor decisionan den bida. Asina aki nan por para pa nan derechonan, cumpli cu nan debernan y desaroya nan talento.
Telefon pa Hubentud ta un organisacion cu ta traha pa y cu mucha y hoben. Telefon pa Hubentud ta kere cu mucha y hoben mester tin participacion den e decisionan di e organisacion. Pa e motibo aki Telefon pa Hubentud na aña 2018 a incorpora un ‘Jongerenraad’ den su organisacion. E ‘Jongerenraad’ di Telefon pa Hubentud ta duna conseho na e organisacion y ta yuda tuma decision tocante cambionan grandi y desaroyonan ariba temanan di mucha y hoben.
Actualmente e ‘Jongerenraad’ ta consisti di 3 hoben entre 11 y 24 aña y ta buscando 2 hoben mas pa bira miembro di e ‘Jongerenraad’ di Fundacion Telefon pa Hubentud Aruba. E hobenan mester tin motivacion, creatividad, ta open pa comparti nan pensamento, interesa den e hubentud di Aruba y por participa den diferente actividad.
Den cuardro di esaki Telefon pa Hubentud a start un campaña pa recluta 2 hoben. Pa por participa e hoben mester haci lo siguinte. Manda nos bo video di bo arte, poesia, baile, cancion of un otro forma di expresa bo mes.
Scohe entre e topiconan di:
- Participacion di hubentud na Aruba,
- E importancia di un ‘child helpline’ na Aruba,
- E efecto cu COVID-19 tin riba e hubentud di Aruba,
- Inclusion y Igualdad.
Bo por post bo creacion riba Facebook, Instagram, TikTok usando e #131Aruba of bo por mande na nos mail telhubentud@gmail.com.
E hobenan tin te cu dia 8 di September 2021 pa post/ manda nan creacion.
Pa mas informacion tocante e campaña por mira e videonan di introduccion di e campaña ariba nos facebook (https://www.facebook.com/telefon.hubentud/), Instagram (131aruba) y TikTok (@131aruba). Tambe por tuma contacto cu Fundacion Telefon pa Hubentud Aruba via nos facebook: https://www.facebook.com/telefon.hubentud/, email: telhubentud@gmail.com of telefon 5886138/ 5884011.