E situacion di COVID na Aruba no ta un situacion agradabel pa hopi hende. Cada ken cu e virus aki a bati na nan porta y cu a perde un famia ta sinti e dolor uno mas cu otro cu no a haya e virus aki rond di nan.
Sinembargo na Aruba y rond mundo ta evolucionando. Belquis Moreu no ta un persona desconoci den nos comunidad y ta kere cu nos como hende mester cuminsa acepta cu cambio ta algo cu ta sosode continuamente.
Loke cu ta pasando globalmente y na Aruba ta cu nos como ser humano mester cuminsa cambia. Segun Belquis berdad cu e situacion di COVID a bolbe subi atrobe y ta na un cantidad cu nos no ta comodo cu ne, banda di esaki tambe a bin cu cierto medidanan cu nos tin cu nos mester tene nos mes na dje.
Den tipo di casonan asina aki segun Belquis Moreu un conocido Happy Coach aki na Aruba , abo como persona no por sinta bay preocupa bo mes riba mañan pero percura pa awe. Loke cu ta importante pa compronde ta hopi biaha nos mes como ser humano mester wak e situacion manera un oportunidad pa saca algo bon di dje.
Ta hopi importante pa cuminsa mira cu den obstaculo tin oportunidad y siña analisa di kico ta loke cu bida kier siña nos for di locual cu ta pasando. Nos como ciudadano mester cuminsa ripara cu e situacion di COVID ta mas cu un aña caba y tin algo cu nos tur tin cu siña.
Ta berdad cu tin algun hende cu ta gusta husga y apunta dede cu ta algo cu no ta positivo. Belquis ta recomenda cu nos tur mester stop di wak pafo y ban cuminsa wak paden di nos y pone como meta con ami como ciudadano por contribui pa locual cu Aruba ta pasando den dje.
Ta importante pa realisa cu e virus no a bin pa dies bay e kier haci un cambio y nos ta cambiando como ser humano. Ta importante pa acepta cu desde cu COVID a cuminsa hende y mayoria di nos a cuminsa reflecciona y para keto y puntra nos mes kico ta e nobo, unda nos ta bay cu e nobo.
Sin kita sin pone loke cu mundo ta evolucionando ta loke cu nos tin cu acepta y no tin pakico haya miedo of temor, pero nos tur mester cuminsa na surpasa e miedo y ban cuminsa saca afo for di e momentonan aki y cuminsa bay dilanti hunto.
