Awor Shortcutz Aruba tambe ta forma parti di ‘Playa Film Festival’ cu e meta di presenta un variedad di peliculanan cortico. Esaki ta haci cu e festival di cine ta conta cu dos categoria di peliculanan crtico cu diferente rekisitonan. Pa e competencia di peliculanan cortico e rekisitonan ta consisti di peliculanan di minimo 5 minuut y maximo 15 minuut. E pelicula cortico no por ta mas bieu cu un aña, e mester tin subtitulo na Ingles y e no por ta riba YouTube of Vimeo. E tipo di peliculnan y videonan ta peliculanan cortico di ficcion, documentario y video di arte. Pa e competencia lo tin un premio pa e miho pelicula y pa participa por bishita e siguinte pagina: filmfreeway.com/playafilmfestival.
Pa loke ta Shortcutz Aruba e duracion ta maximo 30 minuut, e pelicula cortico por ta mas bieu cu 3 aña, e no mester tin subtitulo y no ta haci diferencia si e pelicula cortico ta riba YouTube of Vimeo. E tipo di peliculanan y videonan ta peliculanan cortico di ficcion, documentario, video di arte y video musical. Shortcutz Aruba su rekisitonan ta mas flexibel door cu e no ta un competencia e ta un plataforma pa expone e obranan di creativonan na publico. Pa por participa na Shortcutz Aruba por manda e pelicula of video den formato MP4 pa aruba@shortcutznetwork.com.
E festival di cine tambe ta aceptando peliculanan largo of documentarionan largo pa presenta na publico. Tur e creadornan cu ta participa na e fesival di cine cu un pelicula of un video lo ricibi un carchi cu lo brinda acceso na tur e actividadnan di e festival tanto presentacionnan y actividadnan educativo. E festival di cine lo ta di 1 pa 3 di october y tur actividad lo tuma luga na Ateliers ’89. Riba e prome nochi di e festival lo tin un panel di cineastanan local, sigui pa e apertura di un exposicion di cine local. Durante ful e festival tur anochi lo bay tin un sesion di musica titula ‘The Soundtrack Session’ cu e obhetivo pa crea un ambiente cinematografico pa brinda e oportunidad pa participantenan intercambia ideanan y haci conexion.
E programa educativo lo ta amplio y lo ta habri pa tur edad. Lo tin tayer di makiyahe special di cine pa crea e aparencia di un zombi. Esaki lo ta un tayer pa muchanan y hobennan. Pa adultonan tambe lo tin un ‘masterclass’ di makiyahe pa cine. Tur e tayernan di makiyahe lo wordo duna pa e talentoso Francis Rodriguez. Tambe lo tin tayernan di actuacion pa mucha, hobennan y adulto. Tayer di skirbi script pa cine, planificacion di produccion y traha manqueta di cine pa mucha y hoben. ‘Masterclass’ di formula di haci cine, direccion di cine, lenguahe di cine, diseño di produccion y zonido den pelicula. Lo tin dos seminario di cual uno lo tin e topico di cine caribeño den e era digital y e di dos e topico di industria creativo despues di covid.
Durante e festival di cine e publico lo por disfruta di e presentacion di e proyecto Kids Report unda alumnonan di cuater scol basico a crea diferente videonan cortico di reportahenan. E proyecto di ‘Playa Film Festival’ ta posibel danki na e sosten di Ateliers ’89, Prins Bernhard Cultuurfonds Caribisch Gebied, Setar N.V., Aruba Bank N.V. y Unoca. Pa mas informacion por manda un email na info@cinearuba.com
![Fundacion Cinearuba Ta Ofrece Mas Posibilidad Pa Participa Na E Festival Di Cine Di Playa 157 Cine 3 Scaled](https://www.eanews.com/wp-content/uploads/2021/08/cine-3-scaled.jpg)