Mi ta duna un gradicimento special na tur prensa cu tur dia a keda pendiente di e reunionnan y entrevista e stakeholders”
Diabierna atardi 30 di juli ta cera cu e ultimo reunion di stakeholders cu formador en conexion cu formacion di Gabinete Wever-Croes II. Te cu awo Partido MEP y Raiz a reuni cu 57 stakeholders. Ainda falta varios stakeholder cu ainda mester reuni cu nan. Prome Minister a expresa cu e reunionnan aki ta necesario pa asina Gobierno conoce for di e stakeholders kico nan lo desea pa Gobierno tene cuenta cu ne den e acuerdo di gobernacion.
Por ta tin hende cu ta pensa cu e reunionnan aki ta di mas pero ta importante pa scucha cada stakeholder cu ta trece su mensahe y cada un ta hopi importante. Mi ta gradici tur e 57 stakeholdernan cu a tuma nan tempo pa reuni cu nos”.
Diabierna a reuni cu stakeholders riba e areanan di integridad, husticia, salud y religion. Na final di cada seccion di 45 minuut, cada stakeholder a duna declaracion na prensa y nan a tuma tempo pa gradici Prome Minister tambe pa a envolvi nan den den acuerdo di gobernacion di e siguiente gobierno. Esnan cu a duna declaracion na prensa tawata: Sr. Armand Hessels di Stichting Deugdelijk Bestuur Aruba (SDBA); Sr. Dirk Ormel di Orde van Advocaten; Pastor Frank Daal di Iglesianan Cristian Aruba; Sra. Sharline Farro di Organisacion di Enfermeronan di Aruba (ODEA).
E reunionnan lo continua otro siman. Nos lo no logra sinta cu tur organisacion. Ta scoge stakeholders di acuerdo cu e tema cu lo wordo trata. Pero tur organisacion cu pidi un reunion lo haya atencion sea durante formacion of despues den gobernacion. Cu esaki nos ta cumpliendo cu e palabracion cu nos tin y crea un base mas amplio den e acuerdo di gobernacion. Mi ta gradici tur stakeholder cu a participa y tambe mi ta duna un gradicimento special na tur prensa cu tur dia a keda pendiente di e reunionnan y entrevista e stakeholders y trece e informacion pa nos comunidad”, Prome Minister a expresa.
