Nos hóbennan di Arte di Palabra Boneiru ta kla pa bai kompetí den e kompetensia literario Arte di Palabra na Aruba djárason binidero. Djaweps último e partisipantenan di Boneiru tabata den ‘spotlight’ i a hasi e último preparashonnan promé ku nan biaha pa Aruba. Boneiru lo kompetí den kategoria di poesia eksistente, poesia original, kuenta eksistente i kuenta original ku dies obra. Partisipantenan ta Ramso Coffie, Lygaira Pieters, Jeaniro Dorothea, Maria-Luisa Troncon, Juriella Josephia, Irlenska Martinus, Akeesha Cicilia i Radinka Alberto. Partisipantenan ta bou di guia teatral di Jonathan de Wind. Sekshon di Kultura, Arte i Literatura lo enkabesá e delegashon di Boneiru.
Diputado señora Nina den Heyer, representante di TCB señor Angelo Domacassé i direktor di Direktorado di Komunidat i Kuido señora Silvana Janga-Serfilia a dirigí nan mes na e partisipantenan. A gradisí nan pa nan partisipashon na e kompetensia, motivá nan pa saka lo máksimo di nan talento durante e kompetensia i a animá e partisipantenan pa bria i saka kara di Boneiru manera semper e delegashon di Boneiru a hasi den eksterior.
Djárason 28 di yüli 2021 atardi e kompetensia lo tuma lugá. Por sigui e kompetensia akí via e sistema di ‘live streaming’.
Arte di Palabra ta un kompetensia di deklamashon na papiamentu pa hóbennan den enseñansa avansá na Aruba, Boneiru i Kòrsou. Ta trata di un kompetensia anual i tin komo meta pa desaroyá talento literario hóben i literatura hubenil na papiamentu pa medio di deklamashon di poesia i kontamentu di kuenta. Den pasado Boneiru semper a regresá kas ku premio.
Riba potrèt e delegashon di Bonaire huntu ku Diputado señora Nina den Heyer, representante di TCB señor Angelo Domacassé i direktor di Direktorado Komunidat i Kuido señora Silvana Janga-Serfilia.
