Apesar cu e dos partidonan MEP y Raiz a haya otro hopi lihe pa firma un acuerdo di intencion, e proceso di negociacion pa formacion di un gobierno ta andando den un bon ambiente y cu hopi bon cooperacion.
Por a compronde cu no tin ningun problema pa yega na un gobierno. Simplemente ta siguiendo e proceso pa yega na un gobierno stabil, apesar cu e apoyo den Parlamento ta net net e mayoria (11 asiento). Sinembargo, segun fuentenan cerca di e partidonan, esaki niun momento ta nifica cu e lo bay forma un problema pasobra ambos partido ta consciente di e seriedad di e situacion di Aruba y awor ta momento pa traha pa e isla.
A combersa cu diferente persona y a sigura cu e screening no ta niun problema, pasobra tur persona den ambos partido ta consciente cu esaki ta parti di e proceso. Si resulta cu tin persona cu no por bira Minister pa motibo di no pasa e screening, dirigencia di ambos partido ta bisa cu nan no por haci nada contra esey. “E ta algo cu tur hende ta consciente cu nan mester pasa den dje.
Pero no a yega eynan ainda, pa motibo cu lider di partido MEP como Formado, ta masha ocupa den apenas e di dos fase di e 4-nan cu Formacion di un gobierno ta encera.
Na e momento aki a cuminsa cu e fase di reunion cu Stakeholdernan. Formador ta yama reunion cu instancianan importante di cada sector, cu lo por duna un contribucion den e programa di gobernacion cu ta bay stipula pa e proximo cuatro añanan. Asina por ehempel, a reuni entre otro caba cu sector di Salubridad Publico. Tur nan sugerencia ta keda poni den un documento cu despues ta bay pa e persona cu lo bay haya Ministerio di Salubridad Publico. Segun por a compronde, tin poni riba programa pa Formador reuni cu mas di 70 instancia cu di un manera of otro ta importante den maneho cu mester bay stipula.
Ta completamente normal cu e proceso di formacion ta tuma su tempo. Den pasado a dura rond di tres luna pa pasa den e fase di Informacion pa Formacion. Gobernador mes ta pidi Formador pa sondea bou instancianan cual ta nan pensamento pa cu e siguiente gobierno.
Hecho ta cu tur esnan den partido MEP, segun e fuentenan, ta riba e mesun linea. Cuanto Minister ta bay tin no ta importante awo y no a keda discuti ainda. Ora cu yega e momento ey lo manda nomber di tur e candidatonan pa Veiligheidsdienst Aruba cu ta tin e tarea pa investiga e grupo di persona aki. Asina e proseso ta y asina e mester cana pa na final e carteranan keda bon parti y cu por forma un gobierno fuerte pa e 4 anjanan nos dilanti.
