Departamento di Impuesto ta recorda cu e fecha final pa pago di impuesto di vehiculo di motor di e di dos mita di aña 2021 ta 2 di augustus 2021. Ta importante pa tur contribuyente cumpli cu e deber aki na tempo y asina evita extra gasto innecesario, cual ta e boet administrativo di 50% riba e saldo di impuesto. Si no cumpli cu e pago menciona na tempo, e boet ta wordo procesa y añadi na e debe di impuesto automaticamente dia 3 di augustus 2021. Den e caso aki e contribuyente lo ricibi un cobransa adicional (naheffingsaanslag).
Online Banking
Alabes Departamento di Impuesto ta recomenda tur contribuyente pa paga via e sistema di Online Banking di e banconan local. Uzando e metodo di “Bill Payment”, e pago por sosode facil y sigur.
Pa e pagonan online por wordo procesa corectamente, ta importante pa inclui e siguiente informacion:
– Persoonsnummer cu ta pertenece na e doño di e vehiculo;
– Number di auto (por ehempel: A-95000);
– E periodo di impuesto cu ta pagando (por ehempel: jul-dec 2021).
Despues di haci pago online, por pidi e recibo online yenando e formulario digital “Kwitantie motorrijtuigbelasting aanvragen” via:
https://www.impuesto.aw/uw-digitale-formulieren-snel-en-gemakkelijk-online-invullen-en-verzenden
Pa pago di impuesto di vehiculo di motor por acudi tambe na e oficina principal na Camacuri, e MFA-nan of edificio di Post Aruba na San Nicolas. Ta importante pa menciona cu pago haci na e oficinanan di Departamento di Impuesto por sosode solamente cu debit card. Solamente e personanan di edad 60+ of esnan cu ta haya onderstand por haci pago cu cash na e oficina na Camacuri.
Hopi a cumpli caba
Te cu awor un cantidad grandi di contribuyente a cumpli cu pago di impuesto pa vehiculo di motor y Departamento di Impuesto ta satisfecho di por conta cu un gran parti di nos comunidad cumpliendo cu nan responsabilidad di impuesto. Pa e contribuyentenan cu falta pa paga e impuesto di e di dos mita di aña, Departamento di Impuesto ta recomenda pa tene cuenta cu e fecha final. Gasto extra y cobransa adicional no ta necesario.
Pa mas informacion, bishita www.impuesto.aw pagina di informacion di impuesto di vehiculo di motor na https://www.impuesto.aw/wanneer-moet-u-motorrijtuigbelasting-betalen/
