Recientemente a tuma lugar un emergencia na Baby Beach na unda algun turista a hanja nan mes den problema den awa. E personanan tabata apunto di hoga y mesora algun persona na tera a actua di forma atento y deligente pa tuma accion door di drenta awa y logra yega na e personanan aki, rescata nan y trece nan na tera. Despues di esaki otro personanan presente a sigui pa duna prome ausilio pendiente yegada di ambulance. Despues di esaki nan a wordo transporta pa ayudo medico mas avansa.
Un di e personanan cu a tuma accion di biaha ora di constata cu tin persona den peliger ta Sebastian -Boekhoudt kende ta un di e lidernan miembro di nos organisacion Scouting Aruba den Grupo Scout St. Paulus-Michael. Nos directiva a tuma nota di e informacion y relato di e incidente aki y asina a hanja un splicacion detaya di kico tur a transcuri riba e diasabra dia 12 di Juni ultimo na Baby Beach y a bin na e desicion pa otorga na Sebastian e reconocemento special pa lidernan cu destaca durante un situacion di emergencia agudo den bista di peliger.
E reconocemento aki a wordo entrega na Sebastian dia 12 di Juli ultimo por medio di e insigne oficial, e certificacion y un plakaat. Directiva di Scouting Aruba ta masha orguyoso di nos lider kende a actua di forma deligente pa yuda un otro persona. Esaki ta meramente un di e tanto aspectonan cu un hoben ta sinja den Scouting y ta un momento tan special ora ta mira esaki wordo practica den futuro ora nan ta adulto.
Scouting Aruba ta e asociacion nacionalcu ta coordina e 12 gruponan scout local rond di Aruba. Funda desde 23 di april 2000 actualmente cu 21 aña dirigiendo e movemento na bienestar di nos pais Aruba. E movemento scout na Aruba ta existi pa 91 aña caba y cu bista riba futuro lo sigui brinda scouting di calidad na nos isla basa riba su plan strategico y lidernan cu compromiso y responsabilidad pa guia hubentud di Aruba riba e bon caminda asina educandonan basa riba nos metodo di educacion no formal. Tin 12 grupo scout rond di Aruba, forma parti di nos organisacion door di drenta den contacto via nos facebook page: Scouting Aruba o email: scoutingaruba@msn.com.
Scouting Aruba ta reconoce Sebastian Boekhoudt
