Studiantenan di Lei di e ‘honors program’ di UoC di bishita na SER

Studiantenan di e ‘honors program’ di Fakultat di Derechi di Universidat di Kòrsou (UoC) a hasi un bishita na Konseho Sosial Ekonómiko (SER) djabièrnè 9 di yüli último, kaminda na a ser informá riba e tarea- i aktividatnan di SER i e papel importante ku e konseho aki ta hunga den e proseso di maneho i legalisashon. Banda di e presentashon, ku tabata na kargo di Sekretariado di SER, e studiantenan a haña un ‘casus’ presentá basá riba un petishon ku SER a risibí anteriormente di Parlamento di Kòrsou pa duna un konseho riba un proyekto di inisiativa di lei ku ta proponé introdukshon di un tribunal speshal (‘Small Claims Court’) pa atendé ku konflikto i disputanan den ámbito di konsumo ku un interes finansiero limitá (te na un montante di NAf. 10.000) mediante di un modifikashon di e Kódigo di Prosedimentu Sivil. E pregunta di e ‘casus’ tabata: Introdukshon di un ‘Small Claims Court’ lo kondusí den práktika na un mihó protekshon di konsumidónan?
Basá riba e pregunta ei, e alumnonan a hiba un debate, presentando argumentonan na fabor i kontra. E kalidat di e debate a ser evaluá pa e personal di Sekretariado di SER basá riba konosementu di e kontenido, kalidat di e argumento- i posishonnan i téknikanan di presentashon (aktitut, uzo di man i stèm) di e studiantenan. E debate a konkluí ku e palabrashon ku e konsepto di e konseho ku Sekretariado di SER ta preparando riba e proyekto di inisiativa di lei menshoná, lo ser presentá na e alumnonan universitario di honor pa nan revis’é.
Fakultat di Derechi di UoC ta ofresé studiantenan ku ta siguiendo un bachelor o un máster i ku ta motivá, talentoso i ku ta presta riba un nivel hopi altu, un programa komplementario na e programa universitario normal.
Riba e potrèt di robes pa drechi: Para Jean-Claude Overman (stagiair na SER), Sharlyn Curial-Villarreal (Senior Adviseur ), Silliany Windster, Miloushka Sboui-Racamy (Senior Adviseur), Raul Henriquez (Directeur Algemeen Secretaris), Rajeev Sanchez, Erica Obersi, Rebecca de Knegt (wetenschappelijk medewerker; Sectiecoördinator staats- en bestuursrecht, Faculteit der Rechtsgeleerdheid UoC). Sinta: Sebel Antoin, Chantally Reina en Thalicia Gaffar.