Eleccion Parlamentario 2021 na Aruba a mustra cu e pueblo toch kier a deposita nan confiansa den un grupo di persona cu a dicidi di sea drenta politico of uni nan mes na un partido chikito, cu nan ta mira por ta e futuro pa Aruba. A pesar cu tur hende ta papia cu pueblo a papia palabra cla pa loke ta existencia di partidonan chikito, e turbulencia cu a bini despues di eleccion ta papia un otro idioma.
Ta bon pa analisa, kico ta e problema. E partidonan chikito of mentalidad di algun di e personanan cu ta drenta arena politica cu un aire di grandeza ta e problema?. Ta parce e ultimo aki ta un di e aspectonan cu ta hunga un rol den arena politico na Aruba.
Ta tristo pa mira tur e problemanan andando den e partidonan politico chikito cu a participa den e ultimo eleccion aki. A cuminsa cu partido Accion21, cu a mira dos miembro tuma nan retiro practicamente simultaneamente. Aunke cu por compronde nan postura ta, pakico e denuncianan cu nan a haci awo, no a wordo haci prome cu eleccion. Di un manera of otro a gaña e pueblo votado cu tur cost a bon den e partido, siendo cu nan ta señala hechonan cu a tuma luga prome cu 25 di juni. A gaña pueblo cu tur cos ta na ordo den partido, siendo cu ya caba nan lider tabata haci cierto cosnan cu no ta cuadra. A laga algun mil persona vota pa e partido Accion21, keriendo cu liderazgo di e partido ta diferente. Pero awo ta resulta cu ta parce cu tin un dictadura eyden. Cual ciudadano lo por tin confiansa den Accion21 si eleccion ta diabierna awo, conociendo e circunstancianan aki.
Partido MAS tambe tin problema. A firma un protocol internamente cu awor no ta wordo respeta. Pakico e no ta wordo respeta? Pasobra atrobe prome cu eleccion ya caba e candidatonan tabata sa di e problemanan interno cu hortamento di voto pero den forma hopi directo. Tur hende tabatin un lista cu nan posibel votadonan y, segun splicacion, tabata yama tur hendenan di e lista aki pa haya nan voto, en bes di busca votado di pafo di e circulo aki. Si esaki ta berdad, con por confia un hende asina den Parlamento, si e no ta respeta ni su propio compañeronan di partido.
Por ultimo tin Raiz, un partido cu ta papia hopi di Integridad, pero cu a bay eleccion y niun dia a duna un splicacion di e informacionnan circulando riba e lider. Un informacion cu ta bisa cu a core for di AVB pero mas serio, cu e no por drenta Merca. Tambe a engaña pueblo door di bay un eleccion sin duna un splicacion, pa despues laga pueblo dicidi si ta vota p’e y su partido.
E hechonan aki y experencia den pasado ta mustra pakico mayoria di pueblo ta sigui scoge pa e dos partidonan grandi y tradicional di Aruba. No ta por nada. Nan a demostra den tur e añanan di existencia cu e problemanan cu nan sa confronta cu ne, ta minimo, compara cu e partidonan chikito. Nan a demostra di ta stabiel, apesar cu por tin problema. Conclusion ta parce cu partidonan chikito no ta un opcion pa aworaki.
Sinembargo partidonan grandi ta y a demostra di ta mas stabil y cu nan a hiba gobiernonan pa largo y cu Aruba por a conta cu nan. Aunke tin hopi turbulencia nan a sa di sali pafo y tin un partido y gobierno nan fuerte. Pesey mes ta importante pa Aruba vota consiente.
