Lider di partido RAIZ Ursel Arends tambe a presenta na reunion cu gobernador y na su salida ta gradici tur e votadonan cu a deposita nan confiansa den RAIZ mirando cu diabierna ultimo su mes un persona no por a celebra esaki cu tur e votadonan y partido RAIZ su siguidonan, pero si kier a duna un danki di curason pa e 5474 personanan cu a deposita nan voto y deposita nan confiansa den RAIZ pa asina hunto por cambia politica na Aruba.
Lider di RAIZ a duna di conoce cu awe ta para aki dilanti pa asina sigui duna contenido na e cambionan cu partido RAIZ kier eherce den politica. Segun Lider di RAIZ esaki ta un honor hopi grandi pa su persona unda cu a traha duro durante ultimo 4 añanan unda cu a traha un team dinamico di 12 lider riba nan mes y awe por wak e resultado y confirma e confiansa cu a haya den comunidad. RAIZ ta cla pa sigui duna contenido na esaki y ta cla pa asumi e responsabilidad.
Segun lider di RAIZ Ursel Arends desde inicio RAIZ a para pa integridad y e fundeshi di integridad ta democracia unda cu a sali na varios vocacion pa respira tur institutonan manera Raad van Advies, Algemenerekenkamer , gobernador y e aña aki a sali pa respeta instituto manera di electorale raad y awe ta sali pa representa democracia mes, esaki ta un honor,ta haci esaki cu hopi placer y ta cla pa asumi e responsabilidad.
Segun lider di RAIZ na momento cu ta papia di respeta democracia nos tin cu respeta e resultado di eleccion, esey ta e prome cos cu mester respeta. Actualmente tin tres partido grandi e prome a keda yama prome, e di dos tambe a keda yama y e di tres cu ta partido RAIZ cu ta esun di mas grandi a keda yama pa tin un rol y undabes cu keda yama pa tin un rol. Lider di RAIZ ta kere cu partido RAIZ ta cla pa tuma e responsabilidad sea ta duna contenido como gobierno of den parlamento, pero RAIZ ta cla y dispuesto pa asumi e rol unabes cu keda yama pa forma parti di esaki.
Prome cu tur cos RAIZ ta respeta cu pueblo a scoge pa tin un coalicion atrobe. Segun lider di RAIZ den fin di siman por a tuma nota di diferente noticianan cu ta core rond, pero kier ta bon cla cu RAIZ no ta forma parti di ningun complot y a bisa for di inicio cu lo duna contenido, duna espacio pa e proceso formal canalisa.
Loke cu ta pasando actualmente ta e proceso formal unda cu a keda yama dor di gobernador di Aruba. Durante fin di siman por a tuma nota di yen di potret, Sinembargo na momento cu mi persona a keda acerca mi a bisa bon cla cu mi persona a tuma dos dia di luto pa inverti tempo den mi famia. Na momento cu mi suegra a fayece e no ta solamente mi suegra, pero nos ta biba den cas hunto y mi mester tabatey pa support mi famia mi casa y mi dos yiunan.
For di un comienso e dos partidonan cu a bay sinta hunto den weekend sa cu partido RAIZ no lo participa na ningun complot pero cu ta duna espacio na e proceso formal gana y canalisa y e ora RAIZ lo participa na esaki.
Na momento cu un informador wordo forma lo scucha di tur banda kico ta e posibilidad nan pa tin, sea cu ta forma parti di un coalicion of ta bay parlamento. Pero RAiZ ta habri pa scucha di tur partido kico nan deseo nan ta pa asina tambe sa kico ta e direccion cu RAIZ tin cu bay.
RAIZ ta para pa integridad, actualmente e aparato gubernamental tin tres pilar cu por para riba integridad cu ta Bureau Integriteit, Integriteitskamer y Corporate Governance Code. Lider di RAIZ Ursel Arends ta duna di conoce cu ta sinti cu den e proceso aki e minister nan mes ta keda afo. Alabes RAIZ ta kere cu mester bin un proceso mas formal caminda integridad lo haya su debido atencion na e nivel mas halto cu ta e nivel di minister.
Na e momentonan aki e prome partido di mas grandi ta e prome yama pa cera un coalicion y si no logra e di dos partido mas grandi ta keda yama pa forma un coalicion. Partido RAIZ no ta bay pone nan mes den e rol di gobernador pa dicidi si ta nombra un of dos informador, esey ta keda na gobernador pa haci, pero unabes cu RAIZ keda yama participa RAIZ lo asumi su responsabilidad y lo duna contenido na e rol cu lo keda yama pa eherce tambe.
RAIZ tin e personanan capacita pa forma parti di parlamento y tambe di un minister si esey ta necesario. RAIZ no ta tuma un decision abase di emocion of abase di persepcion pero ta tuma e decisionnan abase di contenido.
Si e posibilidad tey pa yega na un coalicion cu cualkier partido lo mester negosha esaki y tene cuenta cu e puntonan cu RAIZ a presenta den su perspectivanan cu ta compromisonan cu RAIZ tin cu comunidad di Aruba unda cu e puntonan aki mester keda logra tambe den e proximo coalicion