Den cuadra di e siguiente proyecto di Hunto Grandi Grandi Hunto di Fundacion Movemento ta Bida, recientemente a termina un di fasenan den preparacionan di e Proyecto cual lo hiba e nomber “NOS AMISTAD”, cu tawata un curso bou guia di Sra Madelyn Ridderstap, “begeleidingskundige” y Sra Enrita Werleman, “Phycosocial Consultant”.
Durante 4 siman consecutivo nan a percura pa comparti tur conosemento y duna tur herment necesario na e cursistanan y asina tur por subi field cu tur confiansa y cumpli cu e tareanan apunta na cada un.
Cada cursista tin e tarea di bishita un adulto mayor 1 biaha pa siman, durante 12 siman consecutivo, cu ta biba den soledad y/of ta sinti falta di compania. Aki lo comparti un tempo valioso cu e adulto mayor, sea cu un combersacion, lesa un buki cu ne, resa, hunga weganan di mesa, dal un koffie hunto, of haci algo cu e lo sinti bon cu ne. Stella Geerman, Lupita Gil y Ingrid Croes-Dubero, mentornan di e proyecto, lo duna guia na e boluntarionan cu lo bishita e grandinan durante e periodo di 12 siman.
Como parti di e curso, Sra dr Maritsa Ordoñes di DVG a duna un charla extenso, cu tawata carga e nomber ENVEHECIMENTO. Aki cursistanan a haya informacion di e fasenan, con un persona ta enbehece.
Pa finalisa e curso Sr Rudy Leysner di FMTB a hiba palabra y a gradici tur e boluntarionan cu lo partisipa na e proyecto nobo aki, cu ta sigur un necesidad grandi. Tambe a gradici D.T.I. pa nan espacio y tur esnan cu di un of otro forma a duna nan cooperacion y CEDE Aruba pa nan aporte.
Despues cu Rosa Leon, specialista den Gerontologia y alaves coordinador di e proyecto Hunto Grandi Grandi Hunto tambe a hiba palabra, a sigui cu otorgamento di certificadonan na e cursistanan participante, kendenan por cierto tur ta 60+.
Comienso di e proyecto ta tentativamente e siman di 5 pa 9 di juli y lo termina e siman di 20 di september.
Ta premira cu e proyecto aki tambe lo bira uno, cu lo wordo bon acepta mescos cu tur e demas proyectonan cu a wordo presenta door di FMTB, cu a cay den masha bon tera, manera por ehempel :
- Desaroyo Digital, den cooperacion cu SETAR
- Un canto di alegria den bario, durante temporada di Pasco, Dia di Mama y Dia di Tata ultimamente, y e Fiesta di San Juan, hunto cu Grupo Nucleo
- Nos Hofi 60+, hunto cu Cas Shabururi
- Percussion 60+ na San Nicolas
- Tera y Lama pa 60+ na Eagle Beach
- Copy Center pa gruponan di 60+
Na final Sr Rudy Leysner a dirigi bunita palabranan di aprecio y gratitud na Sra Lena Orman di Grupo Nucleo, cu hunto cu su esposo Jose Orman, tawata e motor tras di e proyecto Alegria den Bario, specialmente esun di Tata y Mama y di San Juan, unda a bay canta pa e grandinan cu ta nan so of den casnan di cuido.
Tin algun projecto cu pronto lo bay mira lus di dia y dentro di poco esakinan lo wordo debidamente anuncia.
Prensa lo wordo poni y bon teni na altura manera semper, di e desaroyo di e proyecto “NOS AMSTAD”.
