Awe 28 di juni 2021 durante oranan di mainta Gobernador Alfonso Boekhoudt a yega su oficina pa asina cuminsa cu e ronde di consulta cu e politiconan. E prome na turno pa yega na Gobernador ta presidente di Raad van Advies sr Frits Goedgedrag despues di su salida di reunion cu Gobernador a duna di conoce na prensa cu Raad Van Advies ta un di e conseheronan di gobierno y algemenerekenkamer tambe ta un di nan.
Sinembargo e rol di Raad van Advies den e ronde aki ta cu Raad van Advies ta duna gobernador riba su peticion un opinion riba kico lo mester tene cuenta cu ne si mester bini un informado. Asina eleccion a tuma luga diabierna ultimo Raad van Advies a bini hunto y den e reunion a analisa y ta duna opinionnan di kico gobernador lo por papia den consulta cu e lider politiconan.
Segun Frits Goedgedrag kico ta loke cu a ser papia entre su persona y gobernador ta secreto y no por divulga esaki. Semper tabatin un discusion riba e consehonan cu raad van advies ta duna parlamento. Segun sr Goedgedrag no ta tur biaha cu ta duna e consehonan nan ta keda sigui, pesey mes raad van advies ta conseha y no ta un contrincante di gobierno, parlamento y tampoco di oposicion pero simplemente raad van advies ta duna conseho abase di consenshi y conocemento.
Sinembargo e discusionnan aki no ta solamente na Aruba ta pasa aden, pero na Hulanda tambe unda cu semper tin un discusion den kico gobierno si ta sigui Raad van Advies y den kico no. Raad van advies semper ta spera pa gobierno sigui e stapnan di conseho cu ta keda duna mirando cu nos ta biba den un pais democratico y esey ta locual cu ta sosodiendo.
Di otro banda gobierno di Aruba y parlamento no ta obliga di sigui e consehonan di raad van advies kisas e conseho ey nan ta mire otro , pero tin biaha tambe nan ta sigui e consehonan cu ta ser duna 100%. E unico trabao cu Raad van Advies ta haci , ta cu na momento ricibi un peticion lo duna conseho riba esey y tin momento ta duna conseho sin cu a puntra na momento cu tin situacionnan cu ta pasa den comunidad y cu Raad van Advies ta haya cu e mester duna su conseho abase di loke ta pasando y ta haci esaki tambe.