Aruba a vota y e resultadonan a papia pa su mes. Aruba a biba un momento di democracia na unda cu partido MEP a sali e partido di mas grandi. Lider di partido MEP Evelyn Wever Croes a presenta na sede di MEP hunto cu tur candidatonan riba lista di MEP y a gradici cada un di nan di a hiba un bunita campaña y alabes ta felicita e pueblo di Aruba di a hiba un dia di eleccion hopi ehemplar.
Lider di MEP Evelyn Wever Croes ta felicita cada partido cu a saca nan mes cu a presenta bon ideanan pa pais Aruba. E resultado ta conoci y pueblo a aproba e maneho di Movimiento Electoral di Pueblo (MEP ) . Pueblo a papia bon cla di e echo cu nos mester bringa pa integridad den Gobernacion di berdad.
Tambe pueblo a reconoce e trabao duro y e sacrificionan grandi cu a keda haci den e maneho di nos pais den e ultimo 3 añanan y 9 lunanan pasando den e peor crisis cu Aruba y mundo henter a conoce.
Lider di MEP a expresa cu e ta hopi contento cu partido electoral di pueblo ta e partido mas grandi na Aruba. Apart di esaki pueblo a papia cla y pueblo a pidi un coalicion y partido electoral di pueblo ta cla y dispuesto pa forma e siguiente coalicion pa e gobierno di Aruba.
MEP ta cla pa asumi e responsabilidad ey , pero no cu menasa y no cu forsa, pero cu dialogo pa yega na acuerdonan di e miho interes di Aruba na prome luga. Segun lider di MEP Evelyn Wever Croes biaha pasa a tuma dos luna pa asina cera coalicion y e no tabata facil, pero a enfoca den loke ta uni cada un partido enbes di enfoca loke ta dividi nos y esey ta loke lo bolbe haci.
Na e momentonan aki lo warda riba gobernador su stapnan di apunta un informador cu lo sondia posibilidad nan cu diferente partidonan y despues lo apunta un formado pa forma e siguiente gobierno.
Partido Movimiento electoral di Pueblo ta cla pa Gabinete Wever Croes II. Segun lider di MEP apesar cu nan tin mas cu 3 aña den gobierno y apesar di medidanan dificil mester a tuma den bista di e pandemia cu Aruba tabata aden manera cortamento di salario, empleado publico y empleadonan semipublico .
Apesar cu e situacion economico di nos pais ta dificil asina mes MEP a mantene su forsa y ta gradici cada votado pa cu esaki y specialmente gradici cada candidato pa e campaña cu a hiba cu ta un trabao enormemente duro den circunstancianan hopi dificil, danki na cada un di boso nan pa lucha pa pais Aruba tabata expresion di lider di MEP . E invitacion ta keda pa henter Aruba participa na e parada di victoria diadomingo awo.
