Analisando e debate di Exclusivo/Vota pa ken?, nos por saca afo ya cu tin partidonan cu a cuminsa claim cierto ministerionan, mientras cu ni eleccion a tuma lugar mes. Asina aki tambe nos a wak cu carteranan manera di husticia y infrastructura ta geclaim caba, mescos di enseñanza dor di mas cu un partido.
Claro ta bon derecho di cada partido pa exigi cierto ministerionan, pero esey nos ta kere cu mester sosode despues di eleccion. Cu esaki ta bira obvio cu ya ta premira kendenan riba e listanan aki lo bay ta bira minister. Aki ta resalta cu eleccion di Parlamento pa e partidonan aki ta importante, djis pa alcansa e asientonan, pa asina percura pa cierto candidatonan prominente bira minister.
Pa UPP eleccion di Parlamento e biaha aki ta mas importante cu nunca. UPP ta para ariba cu Parlamento mester haya e respet cu den e decadanan tras di nos lomba a bay perdi. Nos sistema democratico parlamentario cu ta caracterisa su mes como uno “dualistico”, esta cu gobierno ta goberna y parlamento ta controla, mas bien ta un “monistico”, unda cu defacto e gobierno y esnan cu ta sostene gobierno den Parlamento ta bira uno! Aki no tin espacio pa controla gobierno, y ta bira peor ainda na momento cu ta esnan cu mas voto ta bira minister y bo ta haya un desbalance grandi cu ta hiba bo na e tipo di gobernacionnan cu nos conoce aki na Aruba. Un Parlamentario cu no tin e voto suficiente pa corigi y controla un minister semper lo ta na merced di esnan cu si tin hopi voto y cu ta minister. De lo contrario su futuro politico den e partido ta determina. Nos a wak esaki sosode recientemente ora un Parlamentario pensa otro cu resto di su gobierno of coleganan den Parlamento y e ta wordo forza pa cambia di banda en Parlamento.
Frapante tambe ta durante e debate di Exclusivo/Vota pa Ken?, nos por a tende cu cuanto fervor particularmente e partidonan cu awe ta den Parlamento, ta papia di p.e. e screening di minister (hasta parlamentario). Esaki tabata un di puntonan cu nos di UPP a trece dilanti desde 2012 caba, mescos cu asunto di esun cu mas voto mester drenta Parlamento y e sistema di restzetels cu mester wordo cambia, pa duna partidonan cu no a yega net no na un asiento, por tin chens di participa den e reparticion. Y nos di UPP ta wak esaki den cuadro di “democracia bibo” y como un herment pa por tin “bon gobernacion”.
Entretanto a pasa sigur 4 aña cu por a haci tur esakinan, pero ni ley di screening no a wordo cambia despues cu a introduci esaki na 2017 pa ubica un minister cu tabata tin un acusacion contra di dje, y e ley di secuencia di voto ainda lo ta pega un caminda, y nos ta bayendo un otro eleccion cu nos sistema anticua di eleccion. Esaki no ta sirbi ni nos pueblo y ni nos orden democratico parlemtario.
Mas frapante ta, cu UPP su idea di “cambio di sistema di restzetel” ta den nos programa di eleccion 2013 caba. Pero ningun momento, ningun partido den Parlamento na desde 2013 te cu 2021, no a haci nada riba esaki. Pero riba un seccion di pregunta “si of no”, tur partido cu tin representacion den Parlamento a bisa un dikke “SI”. UPP ta contento cu pa e idea aki tin un “COMPROMISO NACIONAL”, pero ta puntra di biaha con sincero e “SI” aki ta. Pesey UPP ta ofrece e REBOOT ARUBA 2.0, pa duna nos pueblo, nos Parlamento y nos democracia e respet cu merece. Y UPP ta kere firmemente cu trabou di partidonan politico y esnan cu wordo escohi ta den Parlamento y no den gobierno. Nos ta kere, mirando e “MEGA-Crisis” cu nos ta aden mester bin un “Crisiskabinet” conforma di no-politiconan cu pa un tempo defini ta bay na atende cu e “MEGA-Crisis”, cu ta consisti di diferente crisisnan. Asina so nos por salba e pais aki den un UNION berdadero, cu su refleho den Parlamento y cu esnan cu tin mas voto! Palabra ta na Pueblo, dia 25 di juni proximo, pa exigi un Parlamento fuerte y un partido cu kier duna e respet na Parlamento ta nos di UPP.
