Jacques Keltjens (vicepresidente di Hof) den su conferencia di prensa riba e relato anual di Hof a señala cu tin 4 klacht entrega pero cu den solamente un caso tin decision tuma.
Den e relato publica ta para cu den 2020 a entrega 14 keho basa riba e Klachtenregeling di Hof. Di e total aki, cuatro di e casonan ta di Aruba. E kehonan ta relaciona cu tanto Huesnan como e personal di Hof. .
Den ley tin un provision cu un ciudadano cu no ta contento cu e trabou haci door di un Hues por entrega un klacht. Pero, e klacht aki no ta bay pa contenido di e decision. E motibo pakico no ta pasobra un ciudadano tin diferente opcion legal pa bay contra un decision tuma den Corte. “E decision di un hues semper por wordo hiba na un magistrado mas halto pa un reevaluacion,” Keltjeus a bisa. Y a agrega cu si drenta un keho pasobra e ciudadano of Abogado ta pensa cu tin un eror den su contenido, e keho ey ta inadmisibel. Ta mustra nan riba e posibilidadnan legal cu nan por cana ora cu nan no ta contento cu resultado di un caso.
Loke cu nan sa experencia hopi biaha ta dos tipo di keho. Un di nan ta e forma con nan a wordo atendi, esta cu no ta contesta nan yamada of a trata nan malo durante yamada; mester a warda hopi riba un decision. Den tipo di casonan asina tin posibilidad cu e comision por scucha e ciudadano / Abogado.
Un otro keho ta cu e ciudadano of Abogado ta pensa cu un Hues a atende di un forma malo, indebido, a grit’e, of no a dun’e palabra pa splica su mes, etc. E tipo di casonan aki si e comision of Presidente di Hof por atende y duna un decision.
Den e relato ta papia di schikking, pero e vicepresidente di Hof no por a corda mesora cu berdad tabatin algo asina.
Wraking di un Hues ta algo completamente diferente. Wraking ta un procedura na Corte, cu tin como meta pa husga e imparcialidad di un hues. E ta un herment legal pa sigura e independencia y imparcialidad di un Hues.
