Aruba a ricibi e prome barco crucero den e era nobo despues di surgimento di e pandemia di COVID-19. Yegada di Celebrity Millenium a bay compaña pa un ceremonia unda tabata presente representantenan di mundo turistico, Prome Minister mr. Evelyn Wever Croes, Minister di Salud Publico, Turismo y Deporte Dangui Oduber pero tambe capitan di e barco y ehecutivonan di Royal Caribbean Group y di Celebrity Cruises.
Celebrity Millenium a mara pa exactamente 8’or di mainta den haf di Oranjestad cu un poco mas di 900 pasahero. Marc Figaroa, director di APA, a conta e situacion dificil den e ultimo 15 lunanan y cada bes ta surgi e pregunta ‘ki dia nos ta bolbe mira e luz na horizonte”. El a papia con niun hende a pensa cu un virus lo paralisa mundo, pone un stop na practicamente tur cos. Mas ainda pa Aruba. Pero, awendia tur hende ta realisa e importancia grandi di turismo crucero den e economia. “Nos frontera maritimo ta oficialmente habri awe,” Figaroa a bisa. Ta berdad tabatin 4 crucero mara den waf, pero sin pasahero y cu tripulación limite.
Pa APA e fecha di awe, reapertura di frontera maritimo ta masha importante, mirando cu nan ta celebrando 40 aña di existencia di APA. “Na APA nos tin 80 empleado cu ta traha pa laga e industria crucero briya. Pero nos no por hacie nos so. Nos mester tur nos partnernan den y pafo di e industria, pa e ta un exito.”
Tur e barconan crucero cu ta registra pa bishita Aruba ta sali for di un puerto di Caribe ya cu Miami ainda no a habri pa barconan crucero. Aworaki tin mas cu 80 bishita di barco programa di awo pa 31 di december. Cu e inicio di e biahenan aki “nos ta orguyoso di ta forma parti di un historia marca. Aruba ta forma parti di e prome itinerario di un barco crucero desde cu nan a stop nan operacionnan 15 luna pasa,” Ronella Croes, Chief Executive Officer di Aruba Tourism Authority (ATA), a bisa durante e ceremonia di diaranson mainta den waf, unda tambe tabata presente delegacionnan di exterior.
“Nos ta parti di e inicio nobo aki cu lo mustra e forsa y resilencia di e industria aki, cu ta mustra di tin tur e ingredientenan pa recupera lihe.” Croes a probecha pa repasa cifranan di pasado te cu a yega na kibra yegadanan record, pa mustra e exito cu Semper Aruba tabatin den e sector aki, danki na e bon cooperacion di e partnernan cu a traha cu nan. “Nos kier sigui traha cu nos partnernan den e era nobo di turismo,” Croes a enfatisa.
Senior vice president di Hotel Operations di Celebrity Cruises, Brian Abel, a recorda su prome bishita den Caribe cu tabata na Aruba ora cu e tabatin 11 aña. E experencia aki, el a bisa, probablemente tabata su motivacion pa traha den e industria aki. Y p’esey e hecho di awe ta un momento historico p’e tambe.
For di 15 luna pasa a traha pa mira con ta trece crucero bek. “Semper pensando den e siguiente stap, ta con pa hacie miho. Y e liderazgo di Aruba a yuda hopi pa haci e regreso un realidad.” Pero tambe el a expresa di bolbe di un forma sigur, cu tur e hendenan abordo vacuna y cu e hendenan di Aruba tambe den su mayoria vacuna.
“Cu yegada di e prome barco crucero awe ta marca cu nos ta den e proceso pa recupera nos turismo completo. E no tawata facil pa nos por yega na e etapa aki pero desde comienso nos tawata tin e conviccion cu nos lo bay logra. Den pandemia nos a bay Miami pa bishita tur e lineanan crucero. Nos a splica nan di nos maneho di Covid-19 y tambe di nos programa di vacunacion. Nos por ta contento awe cu e cruceronan ta bek y nos recuperacion ta sigui den full stream,” e mandatario encarga cu Turismo Dangui Oduber a expresa.
Cu e recuperacion, Aruba lo ta mas fuerte y mas grandi den e industria, e mandatario a bisa.
E prome mandatario mr. Evelyn su awe ta marca e punto di recuperacion di Aruba, e no por lubida 13 di maart, ora cu e ultimo barco a sali for di Aruba. E mesun dia cu Aruba a registra su prome dos casonan di COVID.19. Un periodo unda cu mester a tuma medidanan no popular y hiba un campaña pa logra sali mas rapido di e situacion, encurashando e pueblo pa vacuna. Esaki, el a bisa, ta e unico manera pa convence e hendenan pa bishita Aruba bek. E ultimo lunanan e unico bista for di su oficina tabata e cruceronan mara na waf, sin pasahero abordo, y su inspiracion tabata traha pa e barconan yega mas lihe posibel. Ta mi speransa cu otro barconan crucero bini acerca, banda di esnan cu a tuma e prome paso den e era nobo. “Ban pone tur man hunto y traha na bienestar di tur hende. Danki na tur cu a traha pa e logro aki.
