Lider di POR, Alan Howell, ta contento y orguyoso con e campaña pa eleccion parlamentario 2021 ta moviendo. Eleccion ta tuma luga dia 25 di juni y POR hunto cu su candidatonan ta cana tur dia rond di tur bario di Aruba.
Lider di partido POR a declara cu semper partido POR a sa di traha na bienestar general di henter Pais Aruba. “No tin necesidad pa haci promesanan falso. Nos no ta den tempo pa promesa falso. Ta priminti loke cu por haci, manera POR ya caba a demostra den pasado. Principalmente pa e pueblo di San Nicolas,” e líder Alan Howell a declara.
E candidatonan ta hayando hopi bon recepcion. Nan ta splica pueblo kico nan ta para p’e y tambe con lider di POR personalmente tabata percura, como unico den Parlamento, pa cada biaha pusha pa miho servicio pa e hendenan di pariba di brug, specialmente di San Nicolas. Tin hopi cos mas cu por wordo haci, pero esey por wordo logra solamente na momento cu e pueblo duna e partido blauw scur aki un confiansa hopi mas grandi cu den pasado. Di e forma aki POR tin un voz mas grandi tanto den Parlamento y posiblemente den un siguiente Gobierno.
POR tin plannan grandi pa desaroyo di San Nicolas, locual te cu awor ningun di e dos partidonan grandi a haci. Simplemente ta haci promesanan cada biaha cu tin eleccion y ta bolbe atrobe e siguiente eleccion cu mas promesa, sin splica pakico no a cumpli cu promesanan bieu.
“Wak centro di San Nicolas. Kico a cambia? Nada berdaderamente grandi. Edificionan ta sigui deteriora y no ta mira cu ta bin cu un taskforce pa renoba tur plan pa San Nicolas y pone up to date. Hotel so no ta suficiente, pasobra a keda demostra caba cu den cualkier crisis, e pilar economico aki ta uno sumamente vulnerabel. San Nicolas tin un tereno masha grandi cu tabata di refineria cu por wordo bon desaroya”, Alan Howell ta declara.
POR ta kere cu por bin otro proyecto, kisas cu ta un atraccion tanto pa local como bishitantenan, cu ta economicamente viabel pa e inversionista pero tambe pa e ciudadanonan. Ta papia aki di proyecto banda di otronan cu por genera un entrada pa pais Aruba. Por desaroya un waf pa San Nicolas. Mita di e infraestructura t’ey caba na Zeewijk. Pa e resto ta curashi mester, y esey ta loke cu POR y su candidatonan sigur tin.
