Tur loke a bin ta pasando ultimo tempo den campaña ta indica cu no ta tur hende por yama nan mes lider. Un lider mester demostra respet y no instiga. Esaki sigur ta algo cu no a mira den sr. Mike Eman den e sucedido den fin di siman na Paradera.
A pesar cu autoridadnan ta haci apelacion pa evita aglomeracion, evita actividadnan politico, por a tuma nota cu e ta sigui sosode. Den fin di siman tabatin un actividad politico na Paradera unda cu e lider di AVP Mike Eman mes tabata presente.
No solamente e tabata presente na un actividad cu tabata ilegal pero mester a manda Polis pasobra e propio simpatisantenan di e partido berde tabata subi caminda y stroba e fluho di trafico. Esaki tabata sosode sin cu e “lider” a hala nan atencion. E accion di sticker no tabatin e permiso necesario. Na final, polisnan a haya nan mes obliga di cera un parti di caminda pa evita congestionamento innecesario y stroba e automobilistanan.
Tristo ta cu aparentemente e “lider” berde a tribi di lansa cierto expresionnan cu e lo percura pa cambio na momento cu e ta den gobierno. Cambio contra e funcionarionan policial cu a tribi di cera e caminda y stroba nan den e accion di sticker. “Con por ta posibel cu un persona cu ta yama su mes lider, ta actua di e forma aki. No solamente e polis pero den su propio seno ta duna di conoce cu lo bula cabes di alto inspector Vanessa Kock asina cu e drenta gobierno, esaki sigur ta inaceptabel di cualkier politico cu ta menasa expertonan studia pa un profecion asina importante pa pais Aruba. No solamente un falta di respet pa e funcionarionan, pero un falta di madurez di un politico lider. Di unda el a saca e derecho pa haci expresionnan asina of actua di e forma aki. Como lider bo mester ta ehempel y loke cu Mike Eman a haci e dia aki no ta un ehempel,” ta algun di e comentarionan cu a ricibi.
Otro violacion ta e ponemento di bandera riba caminda publico. Esaki no ta permiti pa ley. Durante tur eleccion ta adverti cu no por uza caminda publico pa pone propaganda. Ni tampoco ora cu no tin eleccion. Esaki ta regla den ley. Sinembargo den fin di siman por a tuma nota cu durante e actividad politico di AVP na Paradera un biaha mas a pone bandera riba caminda publico. Cu rason Polis a ordena pa kita e banderanan.
No mester lubida cu Aruba ni mundo no a sali ainda di e pandemia di covid-19. P’esey mester protege tur votado, mantene distancia y evita aglomeracion. Den e sentido aki no ta compronde pakico partidonan politico ta insisti tanto riba un parada. Ken tin derecho riba parada of no ta, ta e asunto al caso. Un parada na e momentonan aki no ta beneficia Aruba. E isla tin hopi debe caba y problema a causa di e pandemia. Cu un parada, tin cu uza mas polis, en bes di laga nan haci e trabou pa cual nan a studia. Ta pone e ciudadanonan gasta placa den gasolin innecesariamente y riba dje ta causa aglomeracion. Ningun beneficio un parada ta trece pa Aruba y como lider mester ta mas consciente di esaki.