Partidonan político cu ta participa den e proceso electoral andand, ta e promenan pa mustra respet pa autoridad. Sinembargo loke cu a pasa diarason anochi ta un falta di respet total.
For di momento cu autoridadnan a bay pa detene e político y candidato di AVP Beny Sevinger, a cuminsa prepara pa tuma medidanan di precaucion, pasobra nan tabatin informacion cu tin algo planea cu por mina autoridadnan local. Esey ta motibo cu a prepara sede di Marinierskazerne como un alternativa.
A dicidi di hiba Sevinger warda di polis Sta Cruz despues di detencion y su casa a wordo hiba na e warda di Noord, unda nan ta cera ainda.
Inmediatamente despues di e detencion ya caba a scucha e voz di preparacion di un lantamento contra autoridadnan, of un demostracion (uzando nombernan mas suave) pa mustra e malcontento cu ta existi bou e simpatisantenan berde pa cu e detencion.
A yega na oido di autoridadnan cu a yama un reunion pa diaranson atardi, unda lo prepara kico ta bay haci, mientras cu mas tempran caba e lidernan di bario di e campaña di Sevinger ya caba a topa na e sede na Rancho.
Y loke a pensa a sosode, esta cu a bay cu un grupo di persona te na Centro di Husticia na Santa Cruz. Mustrando un falta di respet pa autoridad. Tur persona deteni, tin un motibo cu a yega asina leu. Mester laga investigacion den man di autoridad y tin un Ministerio Publico cu ta dicidi si tin e pruebanan pa detene y un Corte cu lo dicidi si tin prueba suficiente pa condena un persona of no.
Ningun persona of grupo por tuma ley den nan mesun man pero tampoco mina e respet cu mester tin pa autoridad(nan). Warda di Polis, unda e trabou ta tuma luga, mester ta sagrado pa pueblo. Niun hende ni grupo por bay haci bochincha y mina e trabou cu e cuerpo aki ta haci. Mas ainda di un partido politico, cu tin masha hopi aña di existencia y cu ta papia continuamente di respet. Hustamente e mesun partido aki a bin ta violando tur regla y medidanan relaciona cu COVID-19, campañando den barionan y por mira claramente no tin respet pa e prohibicion di samenscholing. Hasta sa mira potretnan, unda campañadonan no solamente no ta mantene distancia, pero tampoco ta uza e tapaboca.
Tur partido politico aki na Aurba mester siña nan simpatisantenan cu respet ta cuminsa na cas, esey ta loke e partido mester siña su hendenan. Ni con malcontento bo por ta, no por bay cu un grupo grandi di hende na e warda, treciendo peligro pa bida di e funcionarionan aki, cu solamente ta haci nan trabou, pero tambe pa e propio simpatisantenan mes si e asunto sali for di man.
Ta un sospechoso no ta significa di ta culpabel, pero tin un proseso cu mester cana y mas trankil e cana e ta miho pa e detenido.
