IBiSA a organisa dia 24 di juni na BTA na Eagle resort e prome serie di 4 torneo di Beach Tennis Escolar na unda Scol Basico Washington, Colegio San Hose, Prinses Amalia Basisschool, Mon Plaisir Basis, Colegio Sagrado Curason, Cacique Macuarima, Colegio Laura Wernet Paskel y Basischool de Schakel ta participando. E torneo aki ta consisti di 28 team di mucha homber den categoria A cu ta pa e muchanan naci na aña 2010 pa 2012. E torneo a wordo hunga ariba 14 cancha di Beach Tennis y den sistema di poule. Studiantenan cu ta competi ta muchanan cu nunca a practica e deporte aki. Meta di deporte escolar ta pa stimula actividad fisico y promove deporte cu na e momento aki ta Beach Tennis.
IBiSA y Beach Tennis Aruba ta felicita e ganadornan. Na prome lugar a keda randon de Leça y Zachary Coffie representando Colegio Sagrado Curason, na di dos a keda Gydeon Greaux y Rocky Franken representando Colegio Laura Wernet Paskel y na di tres lugar a keda Paul Croes y Aedyn Escalona representando Scol Basico Washington. Torneo di Beach Tennis Escolar ta continua dianan 25, 26 y 27 di juni na BTA na Eagle Resort cuminsando pa 3’or di atardi. IBiSA ta gradici e instructornan di Caribbean Beach Tennis School pa entrena y organisa e torneo di Beach Tennis Escolar.
