Poco poco Aruba ta bay ta conosiendo e candidatonan nobo ariba lista di nan partido favorito.
Poco poco e cantidad di personanan cu Covid-19 corona virus ta bahando. Poco poco mas y mas turista ta biniendo nos isla, ku ketobay ta asina bendiciona, un paraiso cu su awanan blauw, santo blanco, tuna y kadushi. Nos pensamentonan sa dual hunto cu e palonan di divi divi of watapana y bula den e mesun direccion , hunto cu e biento fresco cu ta sigui baila riba tononan di gradicimento y alegria, pa un otro dia mas regala. Mas y mas, cosnan y situacionnan ta normalisa.
Aunke ainda no a permiti Cas di Cultura yena cu publico pa e bunita actividad di Diversidad Cultural “Stima locual ta di nos y conose di otro”. Nos ta un isla multi cultural. Musiconan ta contento cu por alegra esnan presente atrobe cu nan cancionnan y melodianan alegre. Bida ta continua, y asina tambe e respet pa tur esnan cu ta vaccuna y respet pa tur esnan cu no ta vaccuna. Nos ta un pais democratico cu libertad pa scoge, libertad di expression y libertad di prensa . Aunke no ta tur den posicion y autoridad ta gusta pa tur berdad sali na cla, esaki ta algo cu ta ancra den karma y naturaleza. Bo ta cosecha locual bo ta sembra, tardi of tempran. Den e mesun of otro forma. Pesey ta bon pa pensa prome cu actua. Respeta bo mes y otro.
Hasi bon y bon lo bin bek pa bo, hasi malo y malo lo bin bek pa bo, ta para den scrituranan of dichonan existente pa siglonan. Mientrastanto nos ta sigui disfruta di bida, dia pa dia, hasiendo nos best tambe pa ta un mihor hende cada dia. Nos a goza di un dushi celebrashon familiar intimo cu e bunita y dushi pareha Mario y Gala Kelly-Tromp recientemente nan Boda di Oro, 50 anja di felis bida matrimonial, den curason di e dushi bario di Ayo, na unda como mucha nos a core hunga subi baha e barancanan, hunga den cunucu, come cashu y druif, hunga den grupo di mucha contento, cara kima di solo. Dushi memorianan cu a bin padilanti. E anochi ey nos a goza di dushi canto y serenata di Mariachi “Luz de luna”, dedica na Mario Kelly y su bunita sra.esposa Gala Kelly Tromp. Tawata reina un super dushi ambiente, cu dushi coi come y coi bebe.
No tin nada mas dushi cu celebra den famia, fechanan importante inolvidabel. Lady Ruth y esposo Johan Vrieswijk, pa medio di esaki, ta felicita Gala y Mai, deseanan hopi bendicion, salud, alegria y sabiduria pa hopi anja mas hunto den nan union di amor. Pabien na nan 3 yuinan y nieta y nietonan balente y potente, talentoso y inspira. Pabien na famianan Kelly y Tromp. Danki cu nos tambe por a celebra cu boso, boso Boda di Oro. Pa termina nos relato di e biaha aki, nos ta desea di felicita tur cu ta di fiesta pa un motibo of otro cu e mihor deseonan pa sigui celebra bida. Na esnan cu ta den tristeza cu perdida di un ser keri, hopi forsa, consuelo y amor. Tristeza ta sigui cana man den man cu alegria. Recorda e sernan keri cu no tey mas den mente,alma y curason. Of atraves di un of otro bunita oracion di paz y trankilidad.
Ban soporta y tolera otro den e tempo di eleccion nos dilanti, ban mantene calmo y respeta opinion y escogencia di otro. Cu nos oracionnan dirigi na Dios pa un bon resultado pa un bon gobierno nobo. Cu gradicimento na e gobierno cu tin cu baha, pa nan bon trabaonan hasi segun nan capacidadnan y segun nan consenshi. Democraticamente ta bon pa cambio y no e mesun nan cu por custumbra cu nan trabaonan y tuma cosnan “for granted”. Ban spera riba un gobierno cu por tin algo di bisa den DOW pa asina laga pone toch un of dos “sleeping police” den Dadelstraat, net un poco mas pabao di Lopez Law, mas o menos dilanti e edificio blauw di King Solomon’s Lodge net prome cu e bahada. Un gobierno nobo cu algun di e biewnan cu experiencia, hunto cu algun nobo cu ta bon studia, capaz y capacita segun nos leynan y conosemento di nan area, pa continua cu un bon of hasta un mihor trabao. Y no cu 100 consehero. Ban wak. E dicho ta bisa, cu cada pais ta hanja e gobierno cu e merece. Si lo tin mucho cambio of no, pueblo tin cu accepta esnan cu lo sinta hunto, sin muchachada di cu “ Mi no por of kier traha cu tal y tal partido, coi mucha chikito cu kier hanja nan kier, si ta asina boso ta pensa caba, boso no bal di ta participa den eleccion. Mi sintimentonan y palabranan transparente como un Poeta cu ta stima su pida baranca y kier wak madurez den cada un pa cu nan responsabilidadnan priminti. Sea humilde, alaves orguyoso y trabahador profesional cu curason. Hasi bo votadornan orguyoso di bo ! Sea un bendicion pa bo pais !
Corda cu tin un Dios riba cada un di nos cabes. Habri boso curason p’E y E lo guia boso sigur den tur sinceridad y honestidad. Consenshi ta algo precioso pa tin. Danki pa lesa nos relato. Te un otro oportunidad. Love you too !
