Parlamentario Robert Cadelaria di fraccion di AVP a mustra cu aki 5 siman Aruba lo scohe su gobierno nobo pero hopi hende ta preocupa cu e situacion di nan trabou, nan salud, nan futuro y tambe nan status legal.
“Na e momentonan aki tin un gobierno cu no kier prolonga permiso., un gobierno cu a priminti amnistía y nos ta asumi cu e kier a priminti asilo pero a priminti amnistía.
En realidad e grupo di hende cu permiso ta un grupo cu a wordo lubida y den hopi sentido castiga pa e gobierno lidera pa Evelyn Wever Croes.
Claramente e principio di ‘campaña ta un y goberna ta otro’ ta aplicabel aki atrobe cu otro gobierno di MEP caminda despues di casi 4 aña di gobernacion. e Prome Minister ta corda cu hopi di e comunidad Latino por vota y awor ta pidi nan pa disculpa y cu awor si lo traha pa nan.
Dicon no a haci esaki e ultimo 4 anja? Despues cu a lubida y neglisha e grupo aki, awor ta pensa pa no prolonga permiso y mandanan bek.
Hopi di esunnan cu permiso ta esunnan cu a integra den nos comunidad. Nan tin hende of empresa cu a firma pa nan haya nan permiso y nan ta paga nan SVB, AZV y tur nan impuestonan
Nan hendenan cu ta haci compras y ta contribuí na economia di e pais, nan ta paga huur, fiansa na banco, gasolin etc, caminda nan yiunan a nace aki y ta bay scol aki.
E no ta husto pa nos ta gosa di nan presencia ora cos ta bon so mientras cu hopi biaha, nan ta e cara di nos turismo.
Awor cu cos ta difícil ta busca forma pa core cu nan y manda nan, nan luga bek caminda banda di e hecho cu esaki ta cruel y inhumano, e ta tambe inprudente. Economistanan a mustra nos cu esaki lo afecta nos economia hopi duro si e grupo grandi aki bandona nos pais den poco tempo.
Nan contribucion lo cay afo, afectando nos economia mas duro ainda cu djis Covid y su efectonan.
AVP no ta reclama so pero manera semper ta bin cu solucion.
Kiko AVP ta propone?
Husticia mester tin un balance entre 2 man, e man di ley duro y e man di compasion.
Prome e man di compasion: Ora un hende drenta nos pais conforme nos leynan y un hende of empresa firma p’e, e mester haya un trato lihe y husto.
E no mester bay di cashi pa muraya y hopi ta reclama cu nan proceso ta tarda y nan no sa unda pa haya informacion.
E ta drenta pasobra e tin trabou y kier contribui na nos economia y e lo mester duna su aporte na nos pais y ta contribui na tur nos fondonan social di impuesto y sin duda nos mester trat’e bon.
Di otro banda, tin e man duro di husticia: Ora un hende drenta nos pais sin permiso, e mester wordo manda bek su pais ya cu nos ta un estado di derecho y leynan ta stipula con y bou di cua condici con un hende por drenta nos pais,” Parlamentario pa fraccion di AVP, Robert Candelaria a declara.
