E problema relaciona cu pago di werksternan di SKOA a caba den Corte, di cual tin un decision tuma e siman aki. Tur cos ta draai rond di loke Centrale Accountantsdienst a bin constata di un suma di casi un miyon florin cu SKOA a haya dos biaha den e subsidionan di Ministerio di Enseñansa.
Tur e problema aki ta relaciona cu e pago di werksternan cu gobierno ta bisa tabata dunando SKOA esaki caba den e placa di subsidio di operacion, mientras cu SKOA tabatin esaki hinca den gastonan di salario (cu en realidad mester ta solamente pa docentenan).
For di 2015 caba a papia cu mester bini un solucion pa motibo cu e gastonan di operacion di SKOA a bin ta subiendo. E tempo ey a dicidi cu e gastonan di werksternan ta wordo hinca den e suma cu gobierno ta subsidia SKOA.
Den un Decreto Ministerial di 21 di januari, 2016, Ministerio di Enseñansa a dicidi di duna SKOA un suma di 970 mil florin, cu ta e compensacion pa gastonan di personal pa loke ta personal di limpiesa pa aña 2015. Esaki a paga na SKOA hunto cu e voorschot di subsidio di salario di februari, 2016.
Den e peticion di voorschot di salario di mei, 2016, a declara un suma di 984.539 pa e gastonan di salario di personal di limpiesa di 2015. Pero Gobierno a paga esaki caba.
Den un carta di dia 11 di februari, 2019 director di Departamento di Enseñansa a presenta na e minister un concepto di decreto ministerial pa loke ta pago di gastonan di operacion di añanan 2011 te cu 2015.
Dia 19 di december, 2019 minister a informa SKOA cu e gastonan di limpiesa di edificio y lokaalnan entrante 2020 no ta bay wordo incorpora mas como parti di subsidio di personal, pero bou gastonan di operacion. Na mesun momento a pidi pa mensualmente, den nan peticion di voorschot di subsidio di personal, hinca e gastonan di salario, sin esun di e personal di limpiesa y den esun di operacion ta hinca e gastonan di personal di limpiesa. Contra e carta aki, SKOA a entrega un obheccion dia 8 di januari, 2020 y a entrega un peticion pa Corte tuma un decision temporal, mientras ta regla e asunto aki. A rechasa e peticion aki na april, 2020.
Den un carta di 10 di februari, 2020 Minister a informa SKOA cu ta haci un investigacion riba gastonan di limpiesa. Centrale Accountantsdienst (CAD) a haci e investigacion aki y a bay principalmente riba tumamento di decision pa loke ta e carta di mei, 2015, e forma con a ehecuta contenido di e carta y e consecuencianan financiero cu esaki tabatin pa pais Aruba.
Den e rapport di CAD di 22 di juli, 2020 ta conclui cu SKOA, mirando e decision di 21 di januari, 2016, y e voorschot di subsidio di salario di mei, 2016, a haya un pago dobel di e suma di 970 mil florin. Tambe a constata cu riba e cuenta anual di 2016, SKOA tin un debe di 999.578 florin di e post di subsidio di salario di aña 2016. Den e suma aki ta inclui e 970 mil florin.