Famia Venezolano Ortega a purba saca varios cantidad di placa for di diferente gobierno na diferente pais, incluyendo Aruba.
E rapport di RDA ta un rapport cu a bin ilustra tur e operacionnan cu tabata andando sin cu pueblo sa, pero pueblo di Aruba ta paga pa tur e mal decisionnan aki.
Manera e rapport di RDA mes ta bisa, e compaña di GTS cu a bin planta un proyecto di algae pa gobernantenan di AVP den e gobierno anterior, a haci hopi daño na pais Aruba.
Un Proyecto cu a costa Aruba 2.5 miyon y sin cu Aruba a haya beneficio di dje. Banda di e Proyecto di algaen tambe tabata cobra pa luznan y generator cu tabata sin conexion y ta cobra via east star, cu ta e mesun compania di e mesun Venezolanonan Ortega, cu ta di e mesun compania GTS, usando stroman H.O.R.G, pero nan mes ta e UBO.
Den e documento di ciere di account di GTS di Aruba Bank cu a keda cera den pleno bisbo di Pasco dia 24 di december 2018, conforme decision di banco.
Tin indicacion cu na varios ocasion GTS a haya diferente carta for di banco pa cumpli pa duna informacion di e transaccionnan cu tabata drenta den e cuenta di banco di GTS. Sinembargo tin indicacion cu GTS a opta pa no contesta Aruba Bank. GTS no a haci caso y esaki lo por tabata e consecuencia cu Aruba Bank a tuma e decision di cera e cuenta riba decision propio.
GTS ta un compania cu ta duna servicio di manpower, contruccion y project management services.
Debi na e situacion aki tur banco na Aruba a cera porta pa e grupo di Venezolanonan aki. Ningun banco tin confiansa den nan mas y mirando e resultado di e rapport di RDA, banco tabatin su rason di a actua preventivo.
Tin indicacion cu Ministerio Publico tin tur documento di transaccion di e grupo di Venezolanonan di GTS.
Sinembargo no ta na Aruba so e grupo aki a bin ta haci daño. Den otro investigacionnan andando por remarca esaki ta un modus operandus di famia Ortega, pues mirando cu na aña 2016, gobierno Peruano a cambia unda cu presidente Pablo Kuczynski Godard a bin na mando, a pone un interupcion operacional riba tur nan proyecto di e compania Pacific Rubales Energy na Peru. Despues di esaki nan a bandona Peru y a bay rumbo Corsou. Ey a haci e mes un strategianan unda cu nan a purba un biaha mas di haci mesun operacion cu tambe a sali nan di malo cu refineria di Corsou.
Despues di Corsou, e grupo Ortega a yega Aruba y a wine and dine cu gobierno di AVP.
Despues cu na Corsou tambe nan a descubri e tipo di maniobra cu ta keda haci pa e famia, a bula pa Aruba y haci mesun modus operandi na unda cu AVP a duna nan carte blanche y a costa Aruba 2.5 miyon. Cu bendicion di esunnan cu tabatin e poder di ehecuta transferencianan di cuenta di RDA y cu a keda menciona tambe den e rapport di RDA unda cu nan a bay di acuerdo cu e Venezolanonan pa probecha di Aruba cu nan bendicion.
Loke ta hopi lamentabel ta cu ningun hende cu ta den bestuur no a reconoce ningun contract entre GTS y RDA. Tur a laba man. Pues esaki ta significa cu no tin ningun contract, nan no ta na altura di nada. Sinembargo pagonan grandi a keda haci y na final ta e pida baranca aki cu yama Aruba, cu nos tur mester defende, a sali perhudica.
