Minister di Turismo, Asuntonan Economico, Trafico y Transporte, Ludmila de Weever a dicidi pa tuma su asiento den Parlamento. “Despues di a pensa un rato riba e periodo delicado aki y despues di consulta cu hopi persona cu tin e miho interes di Sint Maarten na pecho, mi a dicidi pa acepta e asiento den Parlamento,” Minister de Weever a informa.
Dia 21 di april ultimo Central Voting Bureau (CVB) a informa e Minister cu el a wordo eligi pa Parlamento y e tabatin e opcion pa scoge pa tuma su asiento. Minister de Weever a notifica United People’s Party (UPP), Prome Minister, como tambe SVB di su intencion pa move pa Parlamento y tuma un rol hopi mas productivo y activo den e area legislativo.
“Como Minister, mi a sirbi mi pais cu humildad y dedicacion durante e crisis economico mas severo den mas cu un generacion. No tabatin un buki di consulta pa e pandemia aki. Ningun hende den epoca reciente a haya nan confronta cu algo di e magnitud aki, pero nos a pone nos cabesnan hunto y a traha duro. Mi por bisa cu mi a haya experiencia valioso den e proceso. Hopi trabou duro a wordo haci pa yuda restaura actividadnan economico y hopi decision pisa pero necesario na miho interes di nos hendenan mester a wordo tuma. Nos ta papia asina di reapertura di biahamento aereo for di Merca na inicio di augustus aña pasa. Awe, cu ocupacion di hotelnan ta cuminsa subi nos por mira cu e decisionnan ey ta dunando resultado, habriendo e caminda pa un recuperacion stabiel,” Minister de Weever a splica.
“Den Parlamento, mi lo sigura cu e trabou di recuperacion cu nos a cuminsa lo sigui. Mi lo sigui representa mi pais cu tur poder y previlegionan di Parlamento mi tras. E trabou ta sigui,” Minister de Weever a sigui bisa.
Mientrastanto, a palabra cu Minister de Weever lo sigui mantene ambos posicion temporalmente p’asina logra un transicion suave. “E trabou haci durante e ultimo 13 lunanan lo no tabata posibel sin e apoyo di cada trahado den e Ministerio di TEATT, y tur e ministerionan cu a contribui pa recuperacion di nos economia bou di e capitan Prome Minister Silveria Jacobs. E trabou cu nos a cuminsa lo sigui y pa esey, semper mi lo ta gradici,” Minister de Weever a conclui.
1 comment