Lider di AVP Mike Eman hunto cu Parlamentario Jennifer Reyes tabatin un reunion cu delegacion di AHATA y ATIA den cuadro di preparacion di un plan di gobernacion. Esaki ta loke cu Eman a bisa na final di su encuentro.
AVP a haya importante pa reuni y dialoga cu e dos instancianan cu ta maneha comercio y turismo na Aruba. “Nos ta pasando den momento di crisis.
E ta afecta henter comunidad, hotel y comercio ta forma parti di e crisis aki. Den concepto di AVP, Aruba mester di un plan proactivo pa recupera y rescata economia di e isla.”
Cifranan, compara cu otro paisnan, ta demostra cu hopi pais, inclusive islanan di Caribe, ta hopi mas dilanti den vacunacion cu Aruba. Pa yega na e meta di tin un gran cantidad di e pueblo vacuna, mester tin un plan proactivo. Di e forma ey por habri economia, turismo florece, y empleadonan yega na 100% di nan salario. E trahadonan a sufri hopi unda ta ricibi practicamente entre 60 y 80% di nan salario unicamente.AVP a ricibi hopi keho di circunstancianan dificil cu nan ta bibando. Pero tambe ta bira cu turistanan ta yegando, ta haci inversion, mientras ainda nan salario ta na 60%. Mester tin un maneho macro, no solamente pa e isla pero tambe pa su ciudadanonan. Tur esaki ta puntonan treci dilanti den e combersacion cu e instancianan aki.
Eman a bisa cu asina cu partido AVP gana y sinta, e punto principal ta pa bay atrobe na mesa dialogo cu partnernan. Ta na mesa mester yega na un acuerdo nobo di e caminda pa cana pa beneficio di tur hende. “E beneficio no mester ta solamente pa esnan cu lomba hancho y esnan cu tin cu carga e empresanan no ta haya loke nan tin derecho riba dje den e progreso di e economia. Comparti prosperidad den un forma husto ta algo cu ta esencial pa tene comercio y economia sostenibel. Tur hende mester ta contento cu e progreso. “
AVP ta boga pa sinta na mesa y den bon dialogo yega na acuerdonan unda tur hende ta comparti, y tur hende ta crece. “Nos a yega di hacie den pasado, rescata Aruba y AVP un bes mas ta prepara pa haci esey. AVP tin un team di hendenan dedica y cla pa haci e trabou. Nan tin unbista hopi amplio di kico pa haci pa Aruba recupera economicamente, pa pone e costo di bida na un nivel cu pueblo por hala rosea y cumpli cu su obligacionnan. Nos no por sigui biba den un pais unda e trahadonanta haya solamente 60 pa 80% di nan salario y otronan cu no tin ni salario. Nos no ta mira cu gobierno ta trahando y ta duna perspectiva pa un adelanto.”
A sinti for di e institutonan cu Aruba mester cana un caminda di sostenibilidad pa economia di Aruba por recupera.
Lider di AVP a bisa cu nan ta contento cu e reaccionnan aki cu nan lo por hinca den e programa cu AVP ta traha riba dje
