.Poco poco e industria di turismo pa nos isla ta bayendo den un miho rumbo.
Desde e momento cu Aruba a bolbe habri su frontera pa turismo internacional na juli 2020 a bin ta enfoca riba recuperacion di nos industria, na un manera gradual pero man den man cu desaroyo di maneho di contagio di e virus.
Esaki ta canando den bon caminda y e hecho aki ta grandemente mara na e vacuna. Diferente investigacion ta ilustra con mayoria di hende ta indica cu nan lo biaha ora nan ta vacuna. Segun un estudio recien conduci y publica door di e conocido revista di negoshinan prominente Forbes na Merca ta indica cu dos tercera parti di Mericanonan encuesta ta indica cu nan lo sinti nan mes comfortabel pa biaha unabes cu nan ta ful vacuna. Ademas, di e top 10 destinacionnan pa biaha, Aruba ta number 3.
Tambe biaheronan y socionan den turismo ta tene consideracion cu e grado di vacunacion di e destino cu nan lo bishita.
Aruba Tourism Authority ta ricibi pregunta referente vacunacion na nos isla y con esaki ta canando. Tambe CDC na Merca, ekivalente na DVG di Aruba, ta monitorea tambe e grado di vacunacion di un pais – hunto cu otro factornan – pa asina yega na e nivel di risico di un biahe na e pais.
Incluso den e mundo di turismo crucero unda cu por mira cu re-apertura di esaki ta sosodiendo cu pasaheronan y tripulante vacuna. Pues esaki a bira e solucion pa e industria aki por re-inicia.
Mas di nos comunidad vacuna y mas rapido esaki sosode, mas beneficio e lo tin pa sector turistico, pa comercio, pa nos economia, pa cupo di trabou y seguridad na pia di trabou y pa bienestar di nos comunidad pa asina Aruba en general por hiba un bida mas normal y por elimina e restriccionnan gradualmente.
E bishitante y nos socionan ta contento. Hendenan kier biaha bin Aruba, pues yuda bo mes, bo famia y yuda Aruba, simplemente door di sigui protocolnan y vacuna.
