Awe mainta pa 9.30 di mainta Dr. Horacio E. Oduber Hospital a tuma despedida di e prome cuater pashentnan di Corsou. Un momento sumamente emocional y sigur alegre pa e pashentnan di Corsou cu ta debolbe cas sano y cerca nan famia despues di a bataya Covid-19. Team di nurse hunto cu representate nan di Hospital tabata presente pa asina hiba algun palabra, bisa danki y brinda nan un gesto chikito pa nan keda corda Hospital y sigur Aruba cu tabat’ey den momentonan dificil.
Dia 1 di April Hospital di Aruba a anuncia cu den cuadro di solidaridad y humanidad ta saca un man pa nos islanan ruman Corsou y Boneiro cu ta pasando den momentonan sumamente dificil. Na e momentonan ey HOH a escala, habri mas cama pa pashent di Covid-19 cu consecuencia cu algun operacion electivo mester a wordo cancela.
Na momento cu a hiba palabra por a mira e alegria den wowonan di e pashentnan cu ta sumamente gradici cu Aruba a habri man pa nan y e tremendo cuido cu nan a ricibi na Hospital. “Ta un honor cu HOH por extende un man y demonstra hermandad den momentonan di incertidumbre y ta di opinion cu esaki mester ta comienso di mas colaboracion entre e islanan den futuro cercano,” asina sra. Olga Rodriguez a termina.
“Personal di Hospital, aunke hopi cansa mirando cu nan tin mas di 1 aña trahando incansablemente, no a duda pa habri man y yama pashentnan di Corsou y Boneiro bon bini aunke localmente tambe e casonan tabata subiendo. Algo di aplaudi sigur ta cu aunke nan tabata leu e staff y personal di HOH a pone nan sinti den nan curason cu nan ta na cas,” asina Charlaine Huntington di dept. di Comunicacion a menciona.
Pashent Daal a expresa cu “e cariño cu e personal di HOH a demonstra a dune e fortalesa cu ela bira miho y alabes e la bisa danki na pueblo di Aruba cu no a lag’e na caya!”Pashent Paulina kier a gradici tur e staff y personal di Hospital pa e bon servicio. “Mi a bini drumi y awe mi ta bay cas bek sinta, pashent Paulina ta bisa emociona.
Hospital kier a gradici Corsou pa tur e confiansa pa nos por a brinda cuido y duna un man. Na e personal di Hospital cu un bes mas a demonstra nan profesionalismo, pero tambe solidaridad y humanidad y por ultimo e pashentnan local cu a compronde e situacion na momento cu mester a cancela algun oepracion. Aruba ta demonstra un bes mas di ta grandi!
