Polisnan a pone trabou un banda pa un rato awe pa mustra nan malcontento. Nan malcontento ta relaciona cu e falta di materialnan necesario pa nan por ehecuta nan trabou debidamente. Minister di Husticia sinembargo a keda sorprendi, pasobra e Cuerpo aki sigur no a wordo laga un banda door di e gobierno cu e ta forma parti di dje.
No solamente e tabata e material cu personal ta malcontento riba dje, pero tambe e espacio den cual nan ta traha ta hopi chikito. Minister Andin Bikker a reacciona bisando cu “net Gabinete Wever Croes a mas cu cumpli cu Cuerpo Policial. Nan a haya masha hopi material mes y mi tin cu bisa cu mi a keda sorprendi.”
Inclusive, el a reuni cu representante di e polisnan siman pasa dialuna y e precupacion ey no tabata un di e puntonan di agenda. E siman aki atrobe lo tin reunion.
Pa loke ta e espacio, el a splica cu esaki ta un proyecto PPP. E no ta propiedad di gobierno, pero un lease di termino largo. Gobierno no por haci cambio riba dje. Banda di esaki,door di e pandemia a cay atras riba pago di huur, pa cual e doño a bisa di lo no haci cambio te ora cu ricibi tur e pagonan corespondiente. A pidi Finanza pa regla e tema aki.
Pa loke ta e computernan, kier uza e mesun formula cu na KIA, unda ta lease tur nan computernan mescos cu diferente otro departamento.
Na final el a enfatisa cu a duna KPA debido atencion y na mesun momento ta admiti cu falta mas pa haci ainda.
