Construyendo Greenhouse pa grandinan

E construccion di un greenhouse nobo a cuminsa banda di e hospital di The Bottom. E greenhouse lo ta completamente accesibel cu rolstoel pa e clientenan di LIFE Center, un programa pa personanan di edad halto.

Comisionado di Salud Publico y Agricultura Rolando Wilson, hefe di Oficina di Planificacion Bobby Zagers y Project Manager di Oficina di Planificacion Evita Pronk a bishita e area diahuebs pa tira un bista riba e facilidad aki di 22 pa 12 pia, construi door di Donisa Construction.

E construccion aki mester a keda cla denter di poco. E structura, traha di palo, lo tin net parti paden p’asina biento por pasa, y dak di plstic. E shelvenan riba cual e matanan lo wordo poni, ta na altura di rolstoel. Work Monster a pone un rampa caba.

E tanki cu tin na e sitio caba lo wordo uza pa muha e matanan, di cual mayoria ta berdura manera lechuga, prometon, kool, y diferente otro tipo di berdura mas. E clientenan mes lo dicidi cual matanan nan kier planta y cada un ta haya un area asigna pa traha riba dje.

E beneficionan di e proyecto aki ta multiple, segun Comisionado Wilson. “Esaki lo yuda pa mantene e clientenan di LIFE Center saludabel, fuerte y activo,” el a bisa. LIFE Center ta conecta na Benevolent Foundation, e fundacion cu ta maneha un cas pa grandinan, situa banda di e hospital.

E proyecto di greenhouse ta financia door di Ministerio di Educacion, Cultura y Ciencia di Hulanda (OCW), e entidad publico Saba y Benevolent Foundatio. Un greenhouse similar tambe a wordo construi na e scol primario, Sacred Heart School pa e muchanan siña cultiva nan mesun berduranan