‘A yega ora pa bisa ayo na politica tradicional
Diaranson mainta na Aruba Surfside Marina, a tuma luga un conferencia di prensa di partido nobo ‘Accion 21’ cu hopi emocion y alegria anunciando candidato nobo y lansando nan campaña pa eleccion 2021.
Miguel Mansur, liderando e team di ‘Accion 21’ a cuminsa prome na gradici sra. Ghislaine Henstra-Hart pa a compaña nan diaranson mainta como miembro di directiva. “Mi ta para boso dilanti pa e hoben Arubiano cu ta sintiendo rechaso na cas,” sr. Mansur a inicia e conferencia di prensa, agregando cu “tambe pa e hoben Arubiano cu ta sintiendo rechaso na scol, na misa, e dolor cu e rechaso ey ta trece ta algo cu ami a biba 30 aña pasa, algo cu a pone mi no sinti na cas den mi mesun hogar, na mi mesun pais.”
Sr. Mansur a bay biba afo na un edad jong pa studia, y mescos cu hopi studiante cu nunca a bolbe, kisas pa limitacion di oportunidad of discriminacion pa ken nan ta, e tambe a crea su bida den exterior. Durante e pandemia, nos tur a wordo enfrenta cu un momento existencial. Loke a cuminsa como un compromiso di curason cu su rumannan di LGBT, a extende pa un compromiso di curason cu pueblo en general, segun sr. Mansur.
‘Pa ultimo 20 aña, corupcion ta ordo di dia’
Sr. Mansur a subraya cu pa e ultimo 20 aña di nos Status Aparte, gobernantenan ta bezig ta fortalece nan mes mientras nan ta empobrece nos pais. Un estado partidista caminda corupcion ta ordo di dia, ta herencia di politica tradicional. “E momento a yega pa kibra cu nos ciclonan vicioso y recupera un gobernacion confiabel, pa siña di nos grandinan y eherce disciplina y sabiduria pa salbaguardia e promesa di mañan pa tur generacion,” Sr. Mansur a declara.
Durante e conferencia di prensa, a sigui papia riba burocracia, mal maneho y corupcion cu a tene nos trahadonan atras y preveni nan desaroyo pa pro biba nan potencial maximo riba nos isla. Accion 21 a subraya di ta para pa un mehoramento di relacion dentro di Reino y mas cooperacion cu Hulanda. Sr. Mansur: “Como partido liberal progresivo, nos ta kere den un aparato gubernamental eficiente, transparente y honesto.” E partido ta kere den accion, mas cu palabra: y nan kier tuma accion pa revitalisa nos economia, sanea nos finansas, ataka e crisis social, reforma nos sistema gubernamental, amplia nos sistema di enseñansa, introduci cuido preventivo den salubridad publico y enfoca ariba sostenibilidad pa salbaguardia nos medio ambiente.
Anuncio di candidato nobo Daphne Lejuez
Cu gran honor a introduci nan prome candidato tambe riba lista di Accion 21, un persona cu for di 2019 caba a para pa integridad, kende a eherce e curashi pa pone interes di pueblo riba interes partidario. A introduci Daphne Lejuez como candidato den Accion 21, un persona cu a sirbi como ehempel di con un parlamentario mester traha na fabor di Aruba.
