Den un karta fuerte ku un avalancha di pregunta konsehal Daisy Coffie ta duna su reakshon riba e kontesta ku el a haña di gezaghèber relashoná ku su karta tokante e problemátika di BOPEC i riba e desishon di gobièrnu di Boneiru pa duna fiansa na e kurátòr di BOPEC. Den su karta sra. Coffie ta trese e siguiente pregunta- i remarkenan dilanti. Riba kua maneho ta basa e echo ku gobièrnu ta pone sèn disponibel pa kubri gastunan operashonal di e kompania ku a bai fayit? Ku esaki bo no ta krea presedente pa loke ta trata otro kompanianan? Ta parse tambe ku tin violashon di algun prinsipio di bon gobernashon, manera e prinsipio di siguridat hurídiko, prohibishon di arbitrariedat i e prinsipio di igualdat. E motivashon ku ta trata aki di riesgonan di siguridat relashoná ku medio ambiente, hende i naturalesa i posibel sabotahe no ta kita nada for di esaki. Mas aleu Daisy Coffie ta skirbi ku no ta kompletamente kla kon Inspekshon di Ambiente di Biba i Transporte (ILT) por deklará ku tin kestion di un situashon insigur – defakto sin indiká ta di kiko e insiguridat ei ta konsistí -, miéntras ku e mesun ILT ei a laga pòmp tur produkto di zeta for di e tankinan ku nan a kùr af pa tankinan ku nan a kùr bon. Ta inkomprendibel ku Kolegio Ehekutivo ta konformá su mes ku esei i ta pone sèn disponibel tambe. Esaki pasobra hasta si lo tin kestion di un situashon insigur, e ora ei ainda esei no ta responsabilidat di gobièrnu di Boneiru sino di Gezaghèber i eventualmente Hulanda c.q. ILT. Salbaguardiá siguridat di kompanianan priva no ta tarea di gobièrnu.
Curoil, Digicel i Telbo
Komo motivashon pa e fiansa ta indiká tambe e echo ku mester paga suministradónan manera Curoil, Digicel i Telbo di kende ta nesesario ku nan ta sigui hasi entrega despues di bankarota tambe. A investigá kuantu fondo tin disponibel riba e ‘escrow-account’ i riba kuenta(nan) bankario lokal di BOPEC ku por a usa pa esaki? Dikon Curoil no a tuma na su enkargo pa duna krédito na BOPEC, un kliente ku kende pa hopi aña largu nan a hasi negoshi kuné? Tampoko pa mi ta niun tiki kla dikon gobièrnu tin ku paga kuentanan di Telbo i Digicel. Mi tin e fuerte impreshon ku ta usa e krédito ku a duna tambe pa paga salario di e kurátòr. Si esaki ta bèrdat, for di ki dia gobièrnu tin e obligashon aki, asina Daisy Coffie ta puntra.
Skeleton crew
Pa salbaguardiá siguridat ta parse mi nada mas ku normal, ku selekshon i nombramentu di un asina yamá ‘skeleton crew’ – e kantidat mínimo di miembro di personal ku ta nesesario pa operá un kompania i mantené esaki – ta basá riba ekspertisio di e personal ku ta bai selektá, nan eksperensia ku e terminal i e funshon ku nan ta ehersé na e diferente departamentonan. A entregá un lista di e miembronan di personal aki a base di e kriterionan menshoná, òf – manera sindikatonan ta alegá – a bai segun arbitrariedat i a skohe empleadonan ku no opstante ku no tabatin pago di salario tòg diariamente a mèldu nan mes na e terminal i/òf ku ta gosa di simpatia di e gerente general? Gustosamente mi ta deseá di disponé di un lista di e ‘skeleton crew’ – aunke ta anónimo – ku nan abilidatnan i e salario korespondiente. Un di e kondishonnan di Kolegio Ehekutivo tabata ku lo a forma e ‘skeleton crew’ den koperashon estrecho ku sindikatonan i ku a realisá un akuerdo firmá tokante esaki. Kua ta e motibunan pa no kumpli ku e akuerdo aki i dikon Kolegio Ehekutivo a laga e kondishon aki kai?
Na unda e final ta?
Relashoná ku e fiansa ku a duna mi ke ripití akinan e mesun preguntanan ku mi a hasi na gezaghèber, esta: Kua ta e konsehonan di prinsipalmente departamento di finansa riba e petishon aki? Gustosamente mi ke risibí e reakshonnan por eskrito di CFT i ministerio di Asuntunan Interno i Relashonnan den Reino i tambe e kondishonnan bou di kua a duna e fiansa, e responsabilisashon adelantá di e kurátòr i e fakturanan di Curoil, Digicel i Telbo. Niun kaminda ta indiká ku ta trata di un fiansa pa un solo biaha i pa kuantu tempu. Kiko ta bai pasa ora ku e sèn kaba i no a kaba regla e bankarota ainda? E ora ei gobièrnu lo tin ku bolbe duna un fiansa mas? Na unda e final ta? E kurátòr a indiká kon e lo kaba regla e bankarota, por ehèmpel pa medio di buska un operadó òf pa medio di bende BOPEC? Mi ke ta hopi kla i eksplísito den esaki. Ta trata di sèn di nos komunidat ku ta usa pa duna fiansa na un kompania privá ku a bai fayit, loke sin mas ta krea presedente. Prinsipalmente pasobra durante henter e odisea di BOPEC Kolegio Ehekutivo a bisa di no lo bai mete den operashon di un kompania privá. I sigur nò kaminda a determiná ku entre otro pa motibu di mal maneho, sigur pa loke ta trata siguridat, e kompania no por a sigui drai na un manera ekonómikamente salú mas.
Finalmente Daisy Coffie ta supliká gobièrnu di Boneiru ku énfasis pa mas pronto posibel duna ehekushon na e desishon di 4 di mart 2021 ku unánimemente Konseho Insular a aprobá, pa por duna ayudo real na e eks-empleadonan di BOPEC i pa yega na un solushon pa un posibel kontinuashon di e terminal. E konsehal ta pidi tambe pa riba término kòrtiku reakshoná ku tur transparensia i entrega di e dokumentunan relevante riba su preguntanan
1 comment