Den un serie di ceremonia riba mainta di “18 di MAART”, partido AVP a conmemora e cuatro lidernan politico di Aruba cu a funda nos pais: Henny Eman cu kende e lucha pa Aruba bira “baas den su propio cas” na cuminsa na comienso di siglo pasa; Shon A Eman cu a haci e lucha uno di Pueblo henter, cu a recohe e 2143 firma pa sostene e peticion pa Aruba haya su Status Aparte y cu a entrega e “mocion pa Status Aparte” durante di e Conferencia di Mesa Rondo na 1948; Juancho Irausquin cu a cuminsa crea un fundeshi mas fuerte pa nos economia y Betico Croes cu a sigui cu e lucha pa Status Aparte durante di e ultimo 15 aña te na su realisacion na aña 1986.
E conmemoracion aki ta algo cu partido AVP a haci e ultimo 35 aña. Asina ta duna reconocemento y gratitud na tur e lidernan politico di nos pais, cu den nan tempo y nan forma special, a haci trabounan grandi na momentonan crusial di nos historia, pa awe nos ta biba den un pais liber y autonmo den Reino. Nan ta e lidernan cu den temponan dificil a duna direccion y contenido na nos pais pa surpasa retonan politico, economico, social y estatal. Awe cu un gratitud profundo na tur e cuatro fundadornan di nos pais, partido AVP pone un krans na e estatua di e lidernan aki, pa un biaha mas, demostra nan gratitud y admiracion.
Den tempo di crisis severo den nos pais, nos hendenan ta busca luz di alivio y mehoracion pa sali padilanti. Cada uno di e lidernan aki, a conoce di serca e necesidad y e anhelo di Pueblo. Cada uni di nan, a responde na e necesidad y deseo di Pueblo den nan tempo y cu e experiencia di esnan cu a hiba e lucha prome cu nan. Cada uno di e lidernan aki a hiba e lucha y desaroyo di nos pais padilanti cu e instrumentonan cu nan tabata tin y cu e sosten di Pueblo. Awe Pueblo ta gradici nan y sigui cu e lucha pa haci nos pais mas fuerte, mas husto y prospero pa nos tur.
