Parlamentario Endy Croes studiando tur analises nan di efectonan di Covid 19 y alaves mirando posibilidadnan di acuerdo cu expertonan pa cu recuperacion di Aruba pa cu su turismo. Por a tuma nota algun desaroyo hopi positivo. Manera rapport di Standard and Poors a ilustra cu efectonan di Covid economicamente pa Aruba tabata desastroso y Aruba a sali number 1 riba un lista di 122 paisnan rond mundo como e pais mas afecta. No a spera otro como cu nos unico pilar y fuente mayor di entrada ta turismo. Esaki ta e crisis di mas grandi cu Aruba a conose den su historia. Esaki a surpasa “by far” crisis di Natalee Hollaway (2005) y tambe e crisis di 9/11(2001). Riba base global ta mustra cu 1/3 parti di henter mundo ainda na e momentonan aki tin nan frontera sera. E mundo di turismo ta stagna y lo tuma tempo pa recupera. Mundo di aviacion y crusero a sufri un golpi hopi duro y tur ta trahando duro pa por sali for di e impacto nunca bisto aki. Pa Aruba esaki no ta diferente. Expertonan ta mustra cu pa aña 2023 lo alcansa bek cifranan total di 2019. Pues recuperacion lo bay ta gradual pero semper cu e speransa cu Aruba por recupera mucho mas liher cu tur prognostico. Parlamentario Endy Croes ta sinti cu esaki lo bay ta e caso tambe y ta pre mira cu pa 2022 nos lo ta ful bek ontrack.
Rapport IMF recien a ilustra cu turismo a cay cu 67%:
Den e Staff Concluding Statement di article IV Mission di IMF recien di 8 di maart na lid 2 por tuma nota cu “arrivals” di turismo international a cay cu 67% den aña 2020 y alavez e “real” GDP di gobierno a cay cu 25.5 %. E cantidad di turismo cu Aruba a ricibi den aña 2020 ta igual cu e cantidad di aña 1989. Esaki ta pa ilustra con atras e crisis aki a tira nos.
Di dos kwartal den 2021 ta brinda un speransa cu 343.950 asiento total:
Por a tuma nota cu na december 2020 un total di 42 mil bishitante a drenta Aruba cual tabata e peak di mas halto desde Juli cu a habri frontera bek. Tambe por a tuma nota cu Januari y Februari 2021 esaki a cay bek na 31 mil pa cada luna. Den luna di maart ta prognostica cu nos lo alkansa 42 mil bishitante igual cu December 2020. Locual ta mustra hopi alentador ta e segundo kwartal den 2021. Areoliñanan ta ricibiendo un cantidad grandi di “bookings” y a ahusta nan cantidad di asiento pa e segundo kwartal. Tin 343.950 mil asiento disponibel pa e di dos kwartal di 2021 di cual 285.589 mil asiento ta di Merca (USA). Di acuerdo cu e reservacionnan hasi pa luna di Mei y Juni for di Merca den comparacion cu aña 2019, cual tabata e aña record di Aruba den turismo, e aña aki Aruba ta conta cu mas asiento for di Merca den comparacion cu aña 2019. Esaki ta un super bon noticia y un signal positivo. Es decir poco poco e turista ta garando e confiansa y comfortalidad pa biaha bek y ta escogiendo Aruba como nan destinacion. Mas cu klaro nan tambe ta siguiendo e desaroyo di vacunacion di Aruba hopi di aserca cual ta posiciona Aruba como lider den Caribe den comparacion cu nos competencianan. Esaki sigur ta resultado di un gran vision y trabou di Gabinete Wever Croes. Aruba lo conose un cresemento substancial e di dos kwartal den comparacion cu e promer kwartal di 2021. Na nos cadena di turismo, Hotelnan, Food& Beverage, Taxi, Tour Operators y tur cu ta den e cadena aki ban prepara nos hendenan y nos amabilidad pa brinda e servicio spectacular cu nos ta duna den cuadro di recupracion pa cu di dos kwartal. Hunto nos mester hasi esaki. Ban brinda e turista un experencia unico. Mannan na obra!
