Dia 24 di september 2021 pueblo Arubano lo bay un biaha mas urna electoral! E eleccion aki ta uno peculiar pero alabes uno hopi importante, ya cu nos Parlamento y Gobierno, a entrega tur poder na COHO pa e siguiente 7 añanan y no ta keda nada otro cu cumpli cu e condicionnan hancra den e “Landenpakket”.
E pregunta cu ta surgi ta: tin motibo anto pa bay vota ainda, si ta COHO ta dicidi toch? UPP su contesta ta : SIGUR CU SI!! Pasobra historia di Aruba a duna nos na diferente ocasion un motibo pakico mester sigui participa den eleccion y mescos e importancia di cada voto.
E prome ehempel ta e traicion di AVP cu a entrega tur poder na Corsou den añanan cincuenta. Juancho Yrausquin d.f.m. a mustra curashi y balentia. Ela puntra e pueblo sosten pa un plan di accion cu a percura pa un desaroyo formidabel den e añanan siguiente, cu proyectonan manera planta di awa, trahamento di schoolnan y principalmente introduccion di turismo. Asina pues poneniendo un base pa generacionnan despues di dje sigui construi Aruba.
Mescos a sosode den añanan setenta ora Betico Croes d.f.m. a logra convence nos pueblo cu e unico forma pa Aruba diseña su propio destino ta door di distancia di e Antias di 6 y introduci un Status Aparte. Aki Betico tambe a mustra curashi y determinacion! Apesar di tur sorto di contratiempo, tur dos estadista a demonstra cu un pueblo UNI ta un forsa impresionante cu e posibilidad pa forga un desaroyo positivo.
P’esey UPP ta convenci cu awor no ta e momento pa baha cabes y acepta pa wordo hiba na e altar di sacrficio sin mas. Alcontrario awor ta e oportunidad pa mustra mundo henter cu nos tin hendenan capacita, intergro y profesional y cu experencia cu lo por maneha Aruba door di e awanan scur y bruto nos dilanti. Di e manera aki trece bek e orguyo patrio cu tanto nos ta sinti su falta e dianan aki despues di e traicion di e mesun partido(MEP) cu a lucha pa nos Status Aparte, induci pa e gobernacion anterior di AVP cu a hiba un maneho financiero devastador y desastroso.
Pueblo mester huzga y dicta sentencia durante e siguiente eleccion contra e partidonan tradicional cu e percura cu e ultimo diez aña a permiti metemento di e gobierno hulandes dor di nan propio incumplimento y cu a percura cu tanto e pueblo como e gobierno Hulandes a perde tur confiansa.
Kico mester sosode pa trece e confiansa bek, tanto den e pueblo pero tambe e politiconan hulandes??
Aña 2020 den e calendario chines tabata un aña di DJACA. Aña 2020 por ser considera un aña desastroso dor di e pandemia, PERO e pandemia NO ta e motibo cu a perde e confiansa. E pandemia a divulga e realidad amargo cu nos ta experenciando awor.
Un realidad cu nos pais a wordo goberna a base manipulacion, corupcion, politica di patronahe, abuso di poder, atropeo sin misericordia di nos leynan, labamento di placa.
Aña 2021 segun e calendario chines ta e aña di e BUFFALO, un aña na unda nos mester tuma REVANCHA. Pa e revancha ta un exito lo mester trece un cambio drastico den tur sentido di palabra. Mas UNION bou di nos pueblo ta un condicon importante, pero tambe un rechaso total di e partidonan cu a hinca nos den e cataclismo aki.
Vota pa un cambio drastico y fundamental nifica no solamente cambia e caranan, pero full e spectrum politico. Ta asina so por re-establece e CONFIANSA necesario y esaki lo por fungi como un muestra di union y determinancion na “politiek Den Haag” cu awor si lo cumpli cu e reglanan estricto di Good Governance y algun otro leynan pa fortifica nos democracia. Despues cu mara mannan di e politiconan den corto tempo por medio di un “Takenkabinet” y despues di esaki mester forma un delegacion amplio cu participacion REAL di TUR gremio, manera e RCOA, pa bay Hulanda y, cu tur respet, RE-NEGOSHA e combenio cu e gobierno zwak y entreguista a cera cu Hulanda.
Den e REBOOT 2.0 UPP ta ofrece ingredientenan cu lo por sirbi pa manera un “BUFFALO” pa tuma e REVANCHA riba e DJACA (berde y geel)! E Reboot 2.0 aki lo mester desemboca den e NORMAL NOBO na prome lugar pa e politico. Nos mester mustra Hulanda cu nos NO kier ningun pisca regalo mas pero nos kier siña pisca!! Esaki lo percura pa un MANECE NOBO PA ARUBA.
Un Aruba orguyoso di su Status Aparte cu mescos na 1986 (Reboot 1.0) a percura pa un desaroyo fenomenal riba tur tereno cu lamentabelmente no a continua pa motibo di e malgobernacion di e ultimo DIEZ AÑANAN.
E REBOOT 2.0 lo mester percura pa cambionan drastico y fundamental pa asina ey nos bolbe haya un desaroyo fenomenal manera nos a conoce despues di entrada di nos Status Aparte. “SOLO EL PUEBLO SALBA E PUEBLO”. Nos futuro ta den bo man, esta scohe pa nos wordo goberna MALO of scohe pa un gobernacion DRECHI cu lo percura pa un MANECE NOBO!
E ESCOHO TA DEN BO MAN!
