Dialuna atardi Minister di Turismo, Salubridad Publico y Deporte Sr. Dangui Oduber a reuni cu e bestuur di Camara di Comercio. Den un manera hopi transparente e mandatario a presenta e programa nacional di vacunacion. E tabata un encuentro fructifero caminda a discuti diferente tema.
Minister Oduber a mustra Camara di Comercio con e programa nacional di vacunacion ta canando. A papia riba fechanan di entrega di e vacuna como tambe e cantidad di vacuna cu tin planea pa ricibi. Minister Oduber a indica na Camara di Comercio e capasidad di cuanto persona por vacuna riba un dia. Di e forma aki Camara di Comercio ta haya un bista di kiko nan por spera den e lunanan nos dilanti y traspasa e informacion valiosonan aki serca nan miembronan.
Minister Dangui Oduber y Camara di Comercio a intercambia pensamento riba turismo y economia. E programa di vacunacion ta hopi importante pa e recuperacion di Aruba su turismo y economia. Unabes mas y mas hende ta vacuna Gobierno por flexibilisa e medidanan impone, por ehempel e orario di cierre y toque de queda. Esaki lo trece aumento den e benta pa e negoshinan den e sector turistico.
Den cuadro di esaki Minister Oduber a pidi Camara di Comercio pa nan cooperacion den yuda Gobierno cu e parti di registracion. Camara di Comercio a bay di acuerdo cu nan lo yuda percura pa tur compania registra nan empleadonan pa haya e vacuna. Camara di Comercio tambe ta di pensamento cu e vacuna ta e unico herment cu tin pa Aruba por Sali di e pandemia aki y cuminsa recupera su economia.
Minister Oduber ta contento cu Camara di Comercio a ofrece pa yuda den e proceso importante aki y ta consiente con importante esaki ta pa Aruba su economia. Danki pa contribui cu pais Aruba.
