Casi 20 aña pasa a otorga e tereno unda awe ta construi un compleho di condominium na waf. Un proyecto cu despues a keda 17 aña para prome cu un inversionista a cumpra e structura pa finalisa e proyecto.
Awo ta den discusion e pasada pa un pier, construi di forma ilegal riba tereno di APA. E inversionista a bay di acuerdo pa laga e pier, inclusive drecha e area eybanda, poniendo hasta un baño y conexion meter di awa pa e piscadonan.
Loke ta den discusion, di parti di e piscadonan, ta cu e cera e caminda pa yega na e pier pa nan baha nan materialnan y pa final haci nan transporte bek pa cas. Segun por a compronde, tanto APA y e inversionista a bay di acuerdo pa laga e piscadonan pasa pa baha y recoge nan material na final di dia. E unico cos cu no ta permiti ta pa auto di clientenan pasa pa bay cumpra pisca. Esaki lo no mester ta problema pasobra e distancia for di chikito pa e pier banda e condominium ta mas o menos 100 meter di distancia. Esey ta e unico diferencia di opinion cu ta insisti pa habri caminda pa tur cliente di e piscadonan yega.
Ta papia di un piscado humilde. E cantidad di piscadonan cu ta pisca pa consumi propio, ta hopi limita. Un piscado cu drenta aden cu 100 kilo pa luna
E pregunta ta: pakico tanto insistencia pa e caminda aki di parti di e piscadonan? Te aworaki por a nota cu semper ta e mesun caranan ta bini dilanti. Di 5 persona, mientras cu ta papia di mas cu 30 boto. Informacion haya ta mustra cu un di e cinco personanan aki den pasado kier a cuminsa cu e operacion di trece barco di mercancia for di Colombia pa Aruba y mara na e pier ey. Sinembargo e no a haya e permiso necesario. Entre otro pasobra a muda tur e tipo di comercio aki pa waf di Barcadera. E pregunta ta: Esaki kisas lo ta e motibo di tur e gritamento? Kisas lo tin speransa cu un cambio di gobierno lo haya e espacio aki pa baha su cargamento di berdura y fruta? Esaki ta un lucha pa piscado of pa beneficio propio ? ta preguntanan cu ta reina den comunidad cu algo no ta klop.
Ta hopi pregunta tin cu mester busca e contesta, pasobra un simpel caminda pa algun hende yega cu nan auto te na e pier pa cumpra nan pisca, no por ta e motibo di tur e discusion. Banda di esaki, por a compronde cu esnan cu ta yega eynan, mayoria di nan no ta bende pisca cu e ciudadanonan individual, sino ta bende den bulto cu restaurant, supermercadonan of comerciante cu na su turno ta bay haci negoshi cu e pisca.
Segun un experto di ley a bisa, cu den tur maneho mester pone den balans interesnan, y esey lo haci si bay Corte. Ta surgi e pregunta, dicon Sticting Rancho no ta bay Corte si nan ta sinti cu nan derecho of di e pueblo a wordo trapa? Hopi puito lo sali na cla di e motibonan real pakico ta lucha contra un proyecto unda, no solamente localnan a cumpra unidad, pero personanan stranhero cu di e forma aki ta inverti den e isla. No solamente inverti, pasobra den e mesun compleho lo tin restaurantnan cu por cumpra e piscanan asina cu nan drenta waf, y ta evita dolor di cabes pa e piscado keda busca cumprando, mirando cu na tur skina rond di Aruba tin bendemento di pisca awendia.
