Komishon NUKEB, konsisitiendo di Sr James Finies di NKBB, Sra Davika Bissessar presidente di Bonaire Human Rights,, Sr Aljano Emerenciana lider di Un Union Pa Pueblo, Sra Suzy Thode lider di Union Revolushonario Boneriano i Sr Robby Beukenboom lider di Frente Sosial Progresivo i Sr Sedney Marten komo suidadano, a tene rueda di prensa pa ofisialisashon di nan ofisina ku hisamentu di bandera di e diferente partidonan na e ofisina permanente di e Komishon Ehekutivo ku ta enkarga ku pone Boneiru riba e lista di Nashonan Uni, pa un miho Boneiru. Esaki ta situa na Kaya Libertador Simon Bolivar 26, kompartiendo ofisina ku NKBB i Bonaire Human Rights Organizatrion. Sra Davika Bissessar presidente di Bonaire Human Rights a habri e evento i a splika ku NUKEB lo duna aktualisashon riba e proseso di relisting, kon leu esaki ta i kiko ta e ophetivonan, plannan i akshonnan pa e aña aki. Sr Wagner Beaumont a presenta e resumen kompriso di e resultado di e evaluashon den ki grado Boneiru tin gobernashon-propio segun normanan internashonalmente rekonose. E evaluashon ku a konsentra riba tres temanan: Derecho di Autodeterminashon, Aplikabilidat di Leinan, i Igualdat di Satus i Derechonan di e Suidadanonan a huzga nos situashon riba e temanan aki na e nivel di mas abao, promedio di 1 riba un skala te ku 4. Aki un pasashi for di e resumen ….For di e perspektiva di igualdat ekonómiko, e Evaluashon a señalá ku a wanta e benefisionan sosial den e parti “karibense di Reino (Boneiru, Sint Eustatius i Saba)” abou. E stándarnan di apoyo di mas abou a bini na Boneiru, na e mes momentu ku desafionan ekonómiko kresiente, manera: défisitnan komersial haltu, disminushon di e Produkto Interno Bruto, oumento konsiderabel den preisnan di vivienda, kresementu salarial insufisiente, oumento di preisnan i otro faktornan. A hasi menshon di midimentu ku dos midí (lei di trèktu: hanchu pa bo, smal pa mi), ku un kosto di bida signifikativamente mas haltu riba e islanan, ku na Hulanda, pero ku e islanan risibiendo ménos benefisio. Sra Suzy Thode di URB ku ta parti di e sup-komishon pa workshops i informashon a trese dilanti ku NUKEB lo bai eduka i informa e pueblo Boneriano tokante re-listing i derechonan pa medio di workshopnan. Esaki lo ta pa lidernan i tambe lo sigui despues ku seshonan di informashonan den barionan, pa gruponan i tambe organisashonan. Ta hopi importante pa nos ta bon informa pa sa unda nos ta bai. Sr Aljano Emerenciana di UUPP di e sup-komishon pa envolvi hobennan a splika ku un pueblo bon informa por husga i e lo ta aktivo i lo konsentra primeramente pa aserka hobenan. Mas alew Sr Emerenciana a bisa ku lo inisia un kampanja agresivo, den medionan di komunikashon i tambe ku sticker riba auto, ku e slogan : “Ami Si ke ta riba lista di Nashonan Uni” . Sr Robby Beukenboom di FSP ku ta forma parti di e sup-komishon Relashonan Publiko a presenta e prome posishon publiko di NUKEB. NUKEB ta kondena e nombrashonan di Hulandes-Oropeonan den posishonan di institushonan gobernamental i semi-gobernamental. Ehempel ku sr Beukenboom a duna ta ku na Bonaire Internashonal Airport kaminda a hulandisa henter e hunta di komisario i tambe a bai mas lew pa nombra Hulandes-Oropeo tambe den posishonan di direktor i maneho. Meskos ta e kaso por ehempel na e depatamentu di finansia di Boneiru kaminda a kita un lokal komo hefe i nombra un Hulandes-Oropeo. Finalmente esun mas resien, ta manda nos bek den tempu, ta esun ku despues di mas ku sesenta (60) anja pasa tabata tin e ultimo Hulandes-Oropeo komo sekretario di teritorio di Bonaire awor por mira kon ta nombra un Hulandes-Oropeo Sra Pelk for di Alkmaar. E pregunta ta ku no tin niun Boneirano o Antiano ku e nivel ey? O ku no ta ironia pa tur anja gobernantenan ta para na airport ta bisa studiantenan ku ta bai afo, pa bai studia i bin bek bin yuda nos Boneiru, ku esaki ta hypokresia ,i dikon koalishon i oposishon i tur sobra ta parse ta kontentu ku e nombrashonan aki? Riba e lista di Nashonan Uni, e meta prinsipal ta netamente pa promove i jega na propio-gobernashon esey ta nifika ku e posishonanan aki lo wordu jena bek ku nos propio yunan di tera, nos hendenan pa sigura esey. Pesey nos ke ta riba e lista pa nos mes propio hendenan goberna nos isla. James Finies di NKBB na final a splika ku awor ku nos tin e resultado di e investigashon ku a keda kla fin di anja pasa, awor nos a drenta e ultimo fase, i ku e obhetivo ta pa Bonaire wordu pone riba e lista den e proximo anjanan, pa mas tarda 2025. Riba e lista ta duna un garantia na pueblo di Bonaire ku Nashonan Uni lo ta ofisialmente i direktamente involvi pa yuda i asisti Bonaire den e relashon ku Hulanda, kaminda Hulanda lo tin ku raporta, duna kuenta, tur anja na Nashonan Uni kon nan ta kumpliendo ku nan responsabilidat konforme artikulo 73 i derechonan humano i ley internashonal pa ku desaroyo i bienestar di e pueblo Boneriano.
